士砵亭沉淪啃唔落馬里迪莫

猪拉多纳

葡聯盃第三圈C組賽事開打，馬里迪莫主場對士砵亭，名牌球隊士砵亭今不如昔，佢哋開季至今作客未贏過，不過無論點衰都好，呢班波始終無法褪熱，今次作客仍然要讓波，梗係食住條水繼續反啦，呢場蘇豪要「讓球主勝」！

（周三凌晨2時15分開賽）

士砵亭係葡萄牙傳統勁旅，曾幾何時拍住波圖及賓菲加成三強鼎立之局，但近年佢哋不斷將陣中球星變賣，現已淪為葡超二線球會，喺歐霸盃分組賽敬陪末席，醜死怪！士砵亭依家兵微將寡，隊內得番荷蘭年輕前鋒雲禾夫斯雲高較具質素，單天難保至尊，大軍今季聯賽連盃賽作客十一戰不勝，今戰何來本錢讓波？
馬軍主場受讓極筍

馬里迪莫唔算好叻，但喺主場出戰頗具戰鬥力，佢哋於歐霸盃三戰主場未輸過，面對紐卡素、波爾多同布魯日都頂得住，今次面對褪色勁旅士砵亭有得受讓，個盤抵玩到不得了，「讓球主勝」捧得過，進取可博埋3.05倍主勝！