新加坡重賞爭標平手抵撐

猪拉多纳

東南亞錦標賽今晚上演決賽首回合，由新加坡主場迎擊泰國，力奇今晚撐硬主隊，皆因新加坡為實現4奪錦標夢，足總竟然開出咗國家足球史上最高嘅70萬美元（約540萬港元）獎金，正所謂重賞之下必有勇夫，佢哋點會唔打甩髀？加埋佢哋個人造草主場優勢，平手盤梗捧2.12倍「主勝」坐走望贏啦！

（now671台周三晚8:00直播）

打咗3個幾禮拜終於嚟到決賽，新加坡大軍只差一步就有望瓜分70萬美元冠軍獎金，原來呢個數字比起佢哋喺04年同07年捧盃嗰陣多出成倍，巨獎當前班球員梗會搏命。冇錯佢哋今仗會有中場法魯甸梅斯達同施佳懿缺陣，幸好同時都有夏林復出，戰鬥力應該唔會有太大影響，前線42歲箭頭杜歷治老而彌堅，泰國防線未必Mark得佢住。
泰國踢唔慣人造草場

講到底新加坡最大嘅優勢，係佢哋個惹蘭勿剎體育場嘅人造草主場，據聞呢塊草地彈力較正常更強，外人唔易適應。最慘係今仗復出領軍嘅泰國主帥舒哈化，唔知係托大定自信心真係咁爆棚，取消咗原本安排好喺出發前到泰超球會泰國玻璃嗰課人造草場練習，直到尋日先至踩入比賽場地練吓算數，隨時想先喺客場求和，然後等星期六返主場先搞掂新加坡，不過保守求和鬥志不足，最後輸埋有乜出奇？
東南錦賽制

今輪為決賽首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。