盃精漢諾威有條件偷雞

猪拉多纳

寒冷天氣警告昨午發出，今晚捱夜睇波都幾惡頂，如果加時的話就慘上加慘，今晚德國盃16強多蒙特主場對漢諾威，球迷隨時要被「罰留堂」，皆因漢諾威今屆打盃賽都未輸過，演出飄忽嘅衞冕冠軍多蒙特未必喺法定時間內咬得入，4倍「讓球客勝」夠冷又應景。

（無綫翡翠台周四凌晨3:30直播）
多蒙特飄忽衞冕有難度

德甲上半季賽事結束，多蒙特落後拜仁足足12分，要爭取聯賽3連霸似乎冇乜可能，以盃賽為目標其實好正路，但查實對上6場波，就只得剛戰能夠淨勝對手兩球，即使守將基爾同舒姆沙今戰有機會復出，1.6倍「讓球主勝」仍然唔抵博。再睇番佢哋上屆奪冠之路，有兩場都要打到加時先淘汰乙組仔，就知盃賽戰果往往係估佢唔到。

對家漢諾威今季聯賽高不成，低不就，不過踢盃賽就相當醒神，睇番佢哋今季歐霸盃同埋德國盃成績，居然保持12場不敗，已經成為盃賽專家。再講，佢哋喺今季聯賽對住多蒙特都係打成1:1平手，就知今場有望同主隊拉成均勢。
足球重心：漢諾威、賓菲加（讓球客勝）

馬膽推介：1場(4)鑽飾天使

上場1400米僅負於其後再贏嘅「電訊超星」及「大將軍」，級數較一般谷草1000米能手優勝，今仗重戴眼罩有望逼出前速，排埋黃金一檔有望開齋。
盃賽賽制

德盃、荷盃、意盃、英聯盃：德、荷、意盃為16強、英聯盃為8強，以上賽事均以一場過分勝負，若法定時間內打成平手，需加時作賽，再和就互射12碼決勝。

葡聯盃：今輪為第3圈分組賽，16支球隊分4組進行單循環分組賽，每組首名躋身4強淘汰賽。