阿積士留力益格羅寧根

猪拉多纳

今晚有場荷蘭盃16強大戰，由格羅寧根主場對阿積士。阿積士依家專注聯賽爭霸，未必太在意呢個盃仔，加上格軍今仗賽前會表揚球會英雄尼維蘭，今鋪點都唔想失禮，阿積士讓波，力奇寧願捧2.4倍「讓球主勝」好過喇！（開賽時間：周五凌晨3:00）

格羅寧根目前喺聯賽高不成、低不就，盃賽自然格外搏命啦！最緊要係今晚佢哋賽前會搞個騷，表揚啱啱退役嘅舊將尼維蘭。呢位挪威射手喺04至08年効力球會期間，上陣95場射入43球，堪稱格羅寧根之光！係，雖然主隊兩名外援後衞莊拿斯伊雲斯同安美祖漢臣可能喺一月離隊，不過佢哋根本唔係必然正選，離隊都冇影響啦！

對家阿積士主帥法蘭迪保亞啱啱攞咗阿姆斯特丹最佳教練獎，不過佢哋上仗荷甲開W，追到落後榜首雙雄燕豪芬同川迪1分，今晚隨時留力，備戰周末對烏德勒支嘅硬仗，何況格羅寧根近7戰主場只輸過1鋪，阿積士就算砌盡都未必贏到啦！
荷盃賽制

荷盃16強賽事以一場過分勝負，若法定時間內打成平手，需加時作賽，再和就互射12碼決勝。