愛華頓拿手拖「車」

猪拉多纳

2012壓軸 肥賓闖凶地

車路士2012年壓軸戰作客愛華頓，經歷高低起跌嘅一年後，車仔近期三連勝轟入十四粒，重上正軌，但佢哋對上六次作客葛迪遜公園球場不勝全輸盤，完全畀對手剋死。「拖肥糖」本季喺主場不敗惡到暈，今戰對住由仇家賓尼迪斯領軍嘅車仔一定唔會同佢客氣，信愛華頓可保不敗，要「讓球主勝」！

（有線300及200台周日晚9時30分直播）

車路士近期踢出季內最佳走勢，對上七戰贏六場，其中快車期首戰概贈阿士東維拉八蛋打起信心，上場作客再贏諾域治，今戰當然想再下一城。車仔射手費蘭度托利斯重拾射門鞋，進攻中場桑馬達及奧斯卡杜斯山度士等全面上力，賓帥改造大衞雷斯打中場效果亦好，今仗即使缺少隊長泰利，影響亦唔算好大，最大缺點係快車期連續兩場作客出戰，舟車勞頓難免會攰啲。
近三季主場贏晒車仔

不過，車路士最大難題係點樣打破近六次作客愛華頓不勝魔咒，佢哋對上六次喺葛迪遜公園出戰錄得三和三負，對上三季聯賽造訪愛華頓一場不漏全部輸晒，完全冇得揮。「拖肥糖」今季喺主場仍然保持強勢，聯賽主場九戰不敗，包括喺開季首戰擊敗曼聯，同時贏過熱刺，對住阿仙奴打成平手，對住強隊不落下風，賽績硬淨到不得了，車仔唔止難贏，想保持不敗都有難度。

愛華頓續有米拿拉斯養傷，爆炸頭費蘭尼要停賽，但對上兩場冇咗佢哋一樣贏到，後備前鋒安尼捷比夠爛打，拍住謝拉域攻堅火力有保證，大軍仲連續兩次主場出擊，絕對係一大優勢。車仔教頭賓尼迪斯帶領利物浦時期得罪唔少愛華頓球迷，「拖肥糖」主帥莫耶斯都唔妥「肥賓」，今場肯定叫班兵搏盡爭勝落佢面，主隊有坐和望贏之力，「讓球主勝」穩陣，平手盤亦可捧「拖肥糖」。
車仔2012起跌

1. 3/3 炒保亞斯聘迪馬堤奧

2. 25/4 歐聯4強奇迹氣走巴塞

3. 6/5 足總盃贏利物浦捧盃

4. 20/5 贏拜仁首奪歐聯行運一條龍

5. 1/9 歐超盃大敗予馬德里體育會

6. 21/11 賓尼迪斯接替迪馬堤奧

7. 6/12 成首支歐聯分組賽出局嘅衞冕冠軍

8. 16/12 世冠盃決賽不敵哥連泰斯

9. 24/12 戰績回穩，大勝維拉8比0