車仔踩行油「主W」強爆QPR

猪拉多纳

買唔成丹巴巴亞 費托要騷哥利

上場反勝愛華頓令球員士氣到達巔峰嘅車路士，今晚喺2013第一擊主場對住昆士柏流浪（QPR），實繼續踩行油務求重返爭標行列，雖然羅致紐卡素箭頭丹巴巴亞嘅轉會觸礁，但預期喺冬季轉會市場繼續引援刺激之下，近兩場食白果嘅費托肯定會搏到盡，1.58倍「讓球主勝」放心捧。

（有線200、300及廣東體育周四凌晨3:45直播）

賓尼迪斯上任初期受盡球迷唾棄，但係一場接一場嘅悅目勝仗，成功令球迷對佢逐漸改觀。上輪梅開二度帶領車仔終止作客愛華頓連敗劣績嘅林柏特，賽後未有乘機要求續約之餘，仲揚言只想「藍戰士」一直贏落去，鼓勵隊友堅持重返爭標行列嘅信念，將士氣催谷到頂點。雖然喺半場退下火線嘅門將施治證實腹股溝受傷，今場要由端布爾把守最後一關，不過對住啞火嘅昆士柏流浪根本唔成問題。
QPR虛火已過打回原形

車仔喺冬季轉會市場嘅頭號目標丹巴巴亞，因為要求8萬鎊周薪令「藍戰士」卻步，但係由於史杜列治極有可能轉投利物浦，佢哋羅致前鋒仍然有一定嘅迫切性，相信近兩場冇波入嘅費托會加多兩錢肉緊，爭取表現向班主阿布「騷哥利」。

另邊廂昆士柏流浪喺夏利列納接手後的確係有過一段小陽春，不過虛火過後就打回原形，上輪主場對住利物浦半粒鐘唔夠就輸3粒。就算夏利列納同班主費爾南德斯賽後齊齊開聲力撐仲未絕望，但係從保辛華早前公然違抗做後備，日前被罰兩個禮拜人工所見，QPR內部仍然存在唔少問題，季初佢哋就話趁車仔態沉偷雞攞到分，今晚相信好難再有呢支歌仔唱。
昆士柏作客未威過

‧昆士柏流浪今季作客未開齋。

‧車路士連盃賽近4場贏晒。

‧車路士近9場有7場開大。