雲格為保飯碗而戰

猪拉多纳

今晚續有英格蘭足總盃第3圈比賽上演，兩支英超名牌阿仙奴、利物浦分途出擊，由於兩軍已經好耐冇攞過冠軍，球迷等捧盃等到頸都長，為挽回球會信任，預期雲格及羅渣士都會出盡九牛二虎之力，務求過關繼續向錦標邁進，否則今仗隨時會係兩人嘅最後探戈。
多年食白果廠迷躁

足球世界係現實，任你多年來點幫球會賺錢，對傳統球迷嚟講捧盃先係最實際。雲格多年來一直主張「平買貴賣」政策，雖將球會財政弄得頭頭是道，可惜未能留住陣中巨星，故此已經好多年未嘗捧盃滋味。季初兵工廠成績未如理想，球迷中開始有雲格下台聲音，雲格深知自己已非「鐵飯碗」，自然更想捧盃以平息球迷怒火。阿仙奴聯賽落後太多，英聯盃亦已出局，雖然球隊打入歐聯16強，但對手係英超剋星拜仁慕尼黑，而且歐聯高手雲集，要捧盃談何容易，將目標放在英足盃肯定較為明智。
紅軍錯買史杜列治

另一邊廂，羅渣士接掌利物浦後，一心將球隊打造成「英超巴塞」，可惜前朝領隊賓尼迪斯、杜格利殊積落問題並非一朝一夕可以解決，令羅渣士推行改革變得事倍功半。最近紅軍從車路士引入英格蘭前鋒史杜列治，個人覺得這是一個「Bad Move」及「Bone Head Move」，意指隨時碰壁嘅決定，始終史杜列治屬於左腳單蹄馬，踢法亦較獨食，作用跟前紅軍球員賴恩巴布太似，難有真正建設，惟有寄望佢可刺激蘇亞雷斯嘅鬥心，協助紅軍於下半季爭取好成績。

金句：雲格、羅渣士的最後探戈