冇咗「西甲林書豪」華歷簡奴難爆基

猪拉多纳

今輪西甲尾場，由兩支中游分子華歷簡奴同基達菲互相廝殺，前者自失去米捷之後，始終缺乏穩定嘅火力點，加上傷兵滿營，面對經驗豐富嘅基達菲，就算有主場之利都信唔過，「讓球客勝」有計。

（周二凌晨3時開賽）

老實講，華歷簡奴今季戰績唔曳，現時位列第九位，甚至有力爭逐下屆歐洲賽席位。可惜，由於財政困難，華軍為咗區區200萬鎊，就將上季轟入13粒嘅首席射手米捷賣畀史雲斯，頓失進攻支柱，唔好睇比迪、巴迪斯達奧、迪里巴錫組成嘅攻擊鐵三角製造咗15個士哥，雖然他們順起上嚟連數幾粒，但發揮卻異常飄忽，後兩者已經五場食白果，唔係好靠得住喎。

況且華歷簡奴今仗有拉巴卡、荷西卡路士、洛迪等因傷倦勤，而比迪及佐迪阿馬特亦只係剛剛復操，狀態成疑，實在不宜高估。相反，基達菲嘅摩洛哥小將巴拉達持續有進步，令人忘記咗長期傷兵柏度李安，拍住拿菲達及迪亞高卡斯度，啱晒作客打快速反擊。上季華歷簡奴靠住米捷嘅神勇演出，喺兩循環雙殺基達菲，今季冇咗呢位「西甲林書豪」，基軍誓要報番兩敗之辱，「讓球客勝」屬穩陣之選，進取啲可直取客勝。