高路斯死火博拉素細好過

猪拉多纳

日前意甲重開，受「歇冬症候群」影響嘅拉素明顯未上力，「半隊先生」高路斯仲錯失入波黃金機會，今晚意盃8強主場對住「作客蟲」卡坦尼亞，有機會都未必識把握，一於撐1.85倍入球細。

（now633及660台周三凌晨4:00直播）

拉素歇冬後首戰對住卡利亞里，班波好明顯未上力，當中畀《米蘭體育報》封為「半隊先生」嘅箭頭高路斯，連單刀扭過龍門都可以射出界，就睇得出佢哋就係「歇冬症候群」。不過拉素勝在主場威力強勁，喺季初輸過畀熱拿亞後，打後8場7勝1和未輸過，今晚就算自己把握力唔夠，對手要入波贏佢哋亦唔係易事。
卡坦尼亞作客靠唔住

另一邊廂嘅卡坦尼亞，今季意甲9場作客淨係贏過1場咁大把，名副其實係「作客蟲」，就算上仗主場對住拖連奴有中場盧迪打人紅牌被逐，不過仍然佔盡優勢，只係把握力不足令佢哋只能悶和0:0收場。況且，賽前有消息指正箭頭貝基斯奧今晚未必落場，會由中場盧卡斯卡斯度推前一格攻堅，咁嘅鋒線點樣入波呀﹖
盃賽賽制

今輪為8強戰，以一場過分勝負，若法定時間內打成平手，需加時作賽，再和就互射12碼決勝。