巴塞「-2」炒多鋪

猪拉多纳

入球騷賀美斯4奪金球獎

今晚續有3場西盃16強次回合上演，焦點賽事梗係巴塞隆拿主場再遇乙組仔科爾多瓦，「外星人」美斯剛創造歷史，連續四年榮膺金球獎，科爾多瓦去到魯營無謂掃人興喇，首回合贏2比0嘅巴塞勢必用一場入球盛宴，慶祝球王登基，就算讓兩球都照揀「讓球主勝」。

（now 632周五凌晨4時30分直播）

呢場波原本平平無奇，但美斯剛連續四年奪得金球獎，超越咗柏天尼、雲巴士頓、告魯夫等名宿，成為金球獎史上第一人，意義非凡，預計佢賽前會喺魯營球迷面前晒獎示威，全場high爆。事實上，美斯確係弗爆，過去五仗合共入咗八粒，面對科爾多瓦豆腐防線應可繼續數胡。
乙組仔科爾多瓦當靶

除咗美斯之外，其中前場拍檔如恩尼斯達、法比加斯、柏度洛迪古斯都好弗，況且巴塞逢親喺主場踢西盃甚少揸流攤，眾將必想大炒一場為美斯贈興，可憐嘅科爾多瓦慘成祭品，事實上呢支乙組仔近十作客贏得兩場，表現曳爆，加上首回合輸0比2，喺呢場球王晒獎騷無力搞寸party，「地上最強」贏三粒乃最低消費，斯維強捧「讓球主勝」。