皇馬冇C朗照o趙奧沙辛拿

猪拉多纳

話都冇咁快，西甲踢埋今輪賽事就完成一半賽程，老實講吖，暫列第3嘅皇家馬德里落後巴塞隆拿成16分，要後來居上就冇乜可能o架嘞，但為咗面子同尊嚴，點可以畀同市宿敵馬德里體育會騎住先？「銀河艦隊」今晚雖有C朗缺陣，但以希古恩夥拍賓施馬合組雙箭頭，對住包艇嘅奧沙辛拿夠o趙啦，撐2.12倍「讓客」。（now632台周日凌晨3:00直播）
拉莫斯侮辱球證停5場

皇馬剛啱喺西盃4球大炒切爾達晉級，連中三元嘅C朗累積5面黃牌，沙治奧拉莫斯又因侮辱球證，昨晨被西班牙足總罰停賽5場，佢兩個今晚會聯同門將阿丹齊齊坐波監，據講連沙比阿朗素都因為頸傷上陣成疑添。之不過皇馬前中後三線人才濟濟，教練莫連奴根本大把選擇，消息話「寸王」準備擺大個頭，搵傷愈嘅希古恩擔正夥拍賓施馬攻堅，莫迪歷同卡斯拿斯亦會擔正，有前又有後，冇C朗？No Problem啦！

榜尾嘅奧沙辛拿連續4場聯賽失分，翼鋒施斯干沙利斯韌帶撕裂晨早收咗咧，門將列斯高、中場索查、羅拔圖托利斯同洛爾就養緊傷，就連悍將安蘭都走咗去代表加納備戰非國盃，陣容可謂弱上加弱。射手荷西巴洛蘭迪賽前大大聲咁話，憑藉主場球迷支持會打高一皮喎，但睇番佢哋今季喺自己地頭出擊只係贏過利雲特同華歷簡奴，都知洛蘭迪得把口，今晚等劏都似。