基達菲殘陣捱「細」界

猪拉多纳

海鮮波炒唔起格蘭納達

今晚得三場波，唔怕花多眼亂揀錯波，其中頭場西甲獨腳戲，由基達菲主場對CF格蘭納達，係名副其實嘅海軍鬥水兵！前者近六場未贏過，今仗更有多名傷兵，唔似會反彈，不過CF格蘭納達攻不銳守不穩，有鬥志但欠質素，單靠拚勁作客惡唔出樣，咁嘅場合唔慌多波入，阿King認為最好捧細盤。

（周二凌晨3時開賽）

作為馬德里市三哥，基達菲靠住大哥皇家馬德里不斷借兵補充實力，近年於西甲表現平穩，但呢類中游球隊表現總係起伏不定，近六場未贏過就係最佳證明，加上球隊飽受傷患困擾，例如柏度李安、巴拉達同文尼，其中巴拉達缺陣影響最大，呢位摩洛哥小將能攻善守，後上入楔時間好準，常殺對手一個措手不及，冇咗佢令基軍入波能力大打折扣。

好彩CF格蘭納達亦唔係好貨色，儘管比賽態度一流，上仗打少個竟可一度領先華倫西亞，可惜質素所限，最終一分都攞唔到，呢種情況今季經常發生喺CF格蘭納達身上，今仗仲有恩拿高盧比斯及米基爾列高停賽，更加冇還手之力。冇人會懷疑基達菲可借勢反彈，但以佢哋疲弱嘅攻力未必可大炒對手，最好捧細盤。
摩納哥大起拉瓦勒

至於法乙勁旅摩納哥有射手伊巴謙托尼回勇，佢有態嘅話摩納哥就有火力，拉瓦勒近四場正式賽事失十一球，呢場揀大。最後葡超中游分子比拉馬，近幾次主場出擊都入得又失得，對手艾斯杜尼遇到同級球隊亦唔會太被動，預料雙方會對攻，入球大有計。