放低教鞭邁向明天

猪拉多纳

「名成利就，人人想擁有，誰料此刻只嚮往自由，留住這光輝，今天不再等候，奮勇地退出這急流！」今日Peter喺呢個專欄同大家宣布，我決定終結執教生涯，將荃灣教職交畀三名紅褲子出身嘅助教，急流勇退。

Peter自1974年起教中學學生開始，然後涉足職業球壇至今，已經攞過各級別冠軍，嚟緊二月自己又大一歲，終於決定要作出終結，原因有三：第一係年紀大，機器壞，我嘅右膝長期有傷患，喺執教時身體力行咁去做示範動作已經心有餘力不足。第二點係對目前身兼幾職已經覺得吃力，個人嚮往自由，希望留番啲空間畀自己。

至於第三點，係我所執教嘅荃灣已經上晒軌道，記得自2011年復出教荃灣，首屆以不敗身奪得地區丙組冠軍，今屆球隊對手更強，但自去年10月中至上月尾呢3個半月時間，我哋喺丙組保持零失球驕人紀錄，對我嚟講確實值得自豪，亦要感謝班球員嘅聽教同努力。我好想學前曼聯球星簡東拿同湖人嘅積遜教練咁，喺高峰時間退下來，「今天內心感足夠，應走時候決定放手。」唔使擇日子，應走就走，上月尾荃灣1比0擊敗龍城康體之後，已經係我最後一場教練生涯。
波照講稿照寫

Peter教波40年，一直以「不花巧、重踏實，不打茅、重整體」為座右銘，好高興多年來執教嘅球隊從來都冇生事同拉隊離場等不愉快事件，現時荃灣擁有侯耀彬、劉寶華同曾錫昌3位紅褲子出身嘅好教練，我嘅退出唔會對球隊構成影響。不過，日子還是要過的，Peter會繼續向前看，有線同電台波照講，東方日報專欄稿照寫，總之明天會更好！

金句：急流需勇退，係時候放手！