貝迪斯跌Watt 馬體會小勝格

猪拉多纳

如無意外，張峰今日就會隨香港隊出發去烏茲別克首都塔什干，進行首場亞洲盃賽事，同組有烏茲別克、越南、阿聯酋。雖然世界排名全都喺港隊之上，我哋備戰亦唔算充裕，但係經過早前東亞盃外圍賽對澳洲同北韓嘅經驗，球員對教練金判坤嘅部署都有一定了解，有助發揮，拉近同對手距離，希望今次作客有一個好消息帶返香港，開開心心迎接蛇年。

今晚西甲有馬德里體育會對貝迪斯嘅大戰，今季馬體會聯賽成績突飛猛進，好大程度因為主場戰績彪炳，11次主場賽事全勝，單計主場成績連巴塞隆拿都被比下去！相信今晚佢哋可以憑主場之利攞到唔少甜頭。西甲嚟到呢個階段，有兩支球隊表現令張峰感到驚喜，其中一隊就係貝迪斯，依家佢哋喺聯賽榜同馬拉加同分排第5，有力挑戰下屆歐聯參賽資格，所以馬體會應該會陷苦戰，今場隨時小勝，3.45倍「讓球和」夠和味。
射手法卡奧續倦勤

馬體會主場之所以有咁好成績，全因一眾球員交足貨，攻入32球之餘，失球更低至6球，雖然哥倫比亞籍射手法卡奧繼續倦勤，好在其他中前場球員好似阿祖安盧比斯、堤亞高文迪斯、魯爾加西亞等等表現都唔失禮，仲有隊長迪亞高哥斯達狀態亦唔錯，近3場入咗3球，今晚有力數胡！

唔講大家可能唔知，貝迪斯作客成績比主場好，單計作客成績排喺第2位，可見佢哋就算離開自己地頭都有唔錯嘅戰鬥力，雖然班波近期表現有跌Watt迹象，近4戰只得2和2負嘅成績，但正所謂爛船都有三斤釘，作客馬體會應未致於大敗。（now632台周一凌晨4:00直播）

張峰來料：馬德里體育會（讓球和）
馬體會對賽旺開細　

‧馬體會近6次主場鬥貝迪斯5度開「入球細」。

‧馬體會今季各項賽事主場18戰全勝。