非國盃8強重頭戲 科特迪瓦獵殺超霸鷹

猪拉多纳

喺勒斯滕堡踢晒3場非國盃分組賽嘅科特迪瓦，今晚8強戰會繼續留守，除咗慳番啲腳骨力之外，耶耶托尼同謝雲奴等主力休戰一場後亦會復任正選，對住欠缺進攻板斧嘅尼日利亞，贏波過關係簡單任務，1.7倍主W依絲執。 （now676台周日晚11:00直播）

科特迪瓦响今屆16路大軍之中，係唯一可以喺頭兩輪分組賽就拎足6分提早出線，絕對係表現最對辦嗰隊。領隊林武治喺上場例行公事大輪換，防線齋出高路托尼一名主力都未算，就連各自有兩球進帳嘅謝雲奴同耶耶托尼都收起埋，擺明留力砌8強。
尼日利亞進攻欠板斧

相比起科特迪瓦之前3場都留喺勒斯滕堡作賽，尼日利亞就要到最後一輪先有機會喺度「試腳」，就點都蝕咗，不過「超霸鷹」最弊嘅係用嚟用去都係嗰14至15人，前線倚重域陀摩西斯同艾曼紐艾文歷基嘅進攻套路，更加畀人睇通晒，就算喺最後一輪對住全組最弱嘅埃塞俄比亞都幾乎咬唔入，若非尾段靠域陀摩西斯憑12碼連下兩城，真係出唔出到線都未知，今晚對住瓣瓣都秤先嘅科特迪瓦，都係時候執包袱咯。
科特迪瓦火力今屆之冠

‧科特迪瓦喺近3屆非國盃8強全部開大。

‧喺分組賽攻入7球嘅科特迪瓦，鋒力為各隊之冠。

‧對上4屆非國盃合共16場8強戰，有一半喺法定時間內打成平手。
大象踢8強戰開入球騷

今屆非國盃雖然普遍吹「細」風，但今晚科特迪瓦出場，大家就唔使怕冇波入，事關呢隻「非洲大象」3場分組賽大晒之餘，就連對上3屆去到8強淘汰階段，都照樣全部開大收場，條攤路靚到咁，今戰入球大有成2.33倍梗係值博！
非國盃賽制

今輪為8強戰，以一場過分勝負，若法定時間內打成平手，需加時作賽，再和就互射12碼決勝。