阿勒斯殘爆難擋摩納哥

猪拉多纳

今日得六場波開盤，阿King就睇中法乙阿勒斯主場對摩納哥，前者傷兵滿營，排出五人防線卻混亂不堪，面對次席球隊摩納哥，有地利兼受讓都捧唔過，吼摩納哥上盤。（周二凌晨3時30分開賽）

齋睇牌面已知強弱懸殊，最重要係阿勒斯勁多傷兵，唔單止馬馬度馬拉、大衞蘇亞雷斯、夏美奴達馬尼、卡迪受傷上陣成疑，箭頭梅里斯達利整傷足踝肯定缺陣。雖然該隊有自知之明，希望用五人防線做好穩守，但由於彼此對新戰術未夾得熟，發揮差強人意，難怪排緊尾四喇。

其實摩納哥近況都麻麻，不過上仗最後一刻入波逼和甘岡，畀教頭雲尼亞里省到立立令，眾將必定有所警惕，而歇冬後加盟嘅中場奧巴迪有料到，上場後備入替即奉獻助攻，預料今仗會正選上陣，拍住高效射手伊巴謙托尼，足以摧毀阿勒斯嘅脆弱防線，小讓平半值博。
1860操起打「羅」

另外，德乙1860慕尼黑歇冬期間不斷拍跳，狀態回升唔少，相反今仗作客嘅凱沙羅頓仍未走出低谷，只宜採取觀望態度，「讓球主勝」可一試。最後葡超費利拿主場對艾斯杜尼，前者防守固若金湯，聯賽只失12粒防守榜排第二，等閒球隊難越雷池半步，艾斯杜尼好難攻破其大門，入球細好路。