加拉塔沙雷金鑽掃「克」

猪拉多纳

杜奧巴史奈達天王聯手

歌仔都有得唱：「杜奧巴，很想去捕捉他！」今個冬季多間歐洲大會都想擁有杜奧巴，加拉塔沙雷最終成為幸運兒，今次呢隻神級「魔獸」將會喺歐聯領軍主場撲擊德甲球隊史浩克04，主隊有埋荷蘭星級中場史奈達幫手，拍住杜奧巴組成金鑽進攻組合，級數勁高，可助球隊先拔頭籌，小讓平半捧上盤！

（有線62及202台周四凌晨3時45分直播）

車路士上季砌低德甲班霸拜仁稱霸歐聯，杜奧巴絕對係頭號功臣，佢喺決賽幫球隊追平兼射入奠勝十二碼，演出無懈可擊。喺中國經歷短期不愉快旅程後，呢位星級前鋒重返歐洲戰場，上次處子登場後備落場五分鐘即有士哥，足見佢寶刀未老，今次出戰德甲球會史浩克，大家又會見到呢隻「神獸」喺前線衝鋒陷陣，對手後防有排煩。

加拉塔沙雷上次打入歐聯八強已經係01年，沉寂多年後，今個冬季佢哋高調起革命，除咗搵到杜奧巴幫手，仲以超筍價750萬歐元簽下中場指揮官史奈達，呢個荷蘭球星喺09/10季度協助國際米蘭贏得歐聯冠軍，今季因為合約問題畀國米打入冷宮，如今解凍重生再戰歐聯，梗係要加多兩錢肉緊搏取領導層同球迷歡心啦，兩大巨星聯手出擊，絕對係信心保證。
史浩克冬後走樣

史浩克04今屆歐聯分組賽作客三戰兩勝一和，戰績硬淨，不過，大軍近期無復季初勇態，歇冬後對上四戰不勝，只憑新兵米高巴斯圖斯包辦三個士哥，其餘球員不在狀態，加上中場賀治比離隊，影響甚大。其實史浩克作客戰績麻麻，上次喺客場贏波已經係十一月初，即使射手亨特拉爾傷愈復出，今戰亦惡唔出樣，受讓都靠唔住，捧對家！
數讀歐聯

01 加拉塔沙雷頭3場分組賽只得1分，但最後3輪卻獲得全勝，以H組次名資格出線

03 史浩克分組賽3場作客保持不敗，先後擊敗奧林比亞高斯、阿仙奴及打和蒙彼利埃

11 加拉塔沙雷過去11次主場對德國球隊成績為2勝7和2負，其中最近5次未嘗1勝

12 史浩克歇冬後5場比賽只有1場冇失波，其餘4場合共失咗12球

110 加拉塔沙雷於分組賽被侵犯次數為110次，於32支參賽球隊中排第一