AC唔驚跌Watt巴塞

猪拉多纳

攻守兼備 爆棚聖西路做好戲

歐聯16強今晚繼續開火，焦點梗係AC米蘭主場硬撼巴塞隆拿啦！呢兩支傳統勁旅近年喺歐聯嘅成績差距有幾大，相信唔使張峰多講。係，「地上最強」有美斯領銜鋒線，夠晒火力摧毀任何一條防線，牌面點都比「紅黑兵團」秤先，之不過AC大戰經驗豐富，加上弗爆射手艾沙拉維趕及傷愈復出，主場出擊有力同近況跌Watt嘅巴塞鍊，博2.77倍「讓球主勝」。

（有線61、64、201及204、中央5台周四凌晨3:45直播）
賣飛袋5千萬夠畀腦殘1年人工

AC米蘭處於改革階段，派路、施多夫等主力相繼離隊，成績受影響可以理解，慶幸佢哋踏入2013年後已連續8場未輸過，走勢相當唔錯。呢場大戰咁矚目，西班牙《每日體育報》預計聖西路球場大有機會坐爆，為AC帶嚟500萬歐元（約5,178萬港元）嘅門票收入，呢筆錢夠畀巴洛迪利一年波糧有凸，聲勢咁浩大，點都要喺自己地頭做番齣好戲。

查實要頂住巴塞講乜都假，防守穩陣先係勝負關鍵，所以「殺人王」尼祖迪莊同「氣袋」法米尼呢道中場屏障好重要。尼祖迪莊喺2010年世盃決賽嗰腳穿心腿依然令張峰記憶猶新，雖然話佢足踝有傷未必踢得，但法米尼活動範圍大，有助收窄防線嘅空間，有佢頂住一樣夠殺。
艾沙拉維及時傷愈復出

況且《米蘭新聞網》話今季已經攻入15個聯賽「士哥」嘅艾沙拉維可趕及傷愈復出，即使佢有乜依郁，AC仲有個熟晒巴塞條路嘅拉馬西亞青訓精品保贊倒戈候命，就算話巴洛迪利唔符合上陣資格，依然係有前有後，值得我投以信心一票。
巴塞連續9場有失波

作客嘅巴塞啱啱靠美斯梅開二度反勝CF格蘭納達，呢位阿根廷球王真係弗到無朋友，淨係佢一個今季嘅入波已經多過西甲15支球隊。不過另一把尖刀韋拿就因剛剛病愈冇隨隊去米蘭，少咗個目標，變相令美斯壓力大咗，樹大招風都咪話唔惡踢。再講，其實巴塞近況有回落迹象，近7場只贏得4勝之餘，對上9戰仲場場有失波，防線有隱憂隨時畀AC乘虛而入，開個「讓主」一啲都唔奇！
AC主場鬥巴塞輸唔晒

‧AC近7次主場對巴塞取得2勝2和3負。

‧雙方過往15次對碰，AC取得4勝5和6負成績。

‧上屆歐聯8強首回合AC主場與巴塞打和0:0。
扒冷捧紅黑軍6.7倍主W

遇着「地上最強」嘅巴塞隆拿，AC米蘭今晚就算有主場之利，都一面倒畀莊家睇低列做冷門，但查實AC喺過往15次同巴塞嘅對碰當中，有高達6成不敗率之餘，喺上屆歐聯8強首回合主場亦同巴塞踢成0:0，今場想扒冷不妨捧6.7倍主勝，夠晒好分啦！