加拉塔沙雷攻無不「克」

猪拉多纳

杜奧巴＋史奈達攜手搏殺

8場歐聯16強嘅戲碼當中，原本加拉塔沙雷對史浩克04呢個對碰，係最被球迷忽略，不過隨住加拉塔沙雷連簽史奈達同杜奧巴兩大巨星，叫座力當堂大大提升！今晚呢隊「土超」勁旅會先喺主場擺下擂台，小弟就睇好佢哋可以旗開得勝，讓平半值得信賴。

（有線62及202周四凌晨3:45直播）

加拉塔沙雷喺今屆歐聯初段表現麻麻，頭3場分組賽更只得1分，當時連出線都危危乎，到最後一輪先力壓克盧日晉級。唔知係咪時來運到，16強淘汰賽居然又畀佢抽中對史浩克呢支「上上籤」。

當然佢哋手執上籤都唔敢怠慢，喺一月冬季轉會期即刻斟掂荷蘭中場史奈達，以及科特迪瓦前鋒杜奧巴。佢兩個最值錢之處係有能力單獨扭轉賽事形勢，小弟到依家仲好記得杜奧巴上屆點樣單天保至尊，幫車路士歷史性捧走歐聯。我當然唔係話「魔獸」可以幫加拉塔沙雷贏冠軍，但以佢力量型嘅踢法，喺歐聯真係好煞食，再配合加拉塔沙雷個「地獄主場」威力，今場絕對可以睇高一線！
史浩克亨特拉爾狀態成疑

史浩克喺分組賽力壓阿仙奴首名出線，可惜黃金期亦隨之結束，喺德甲亦已經跌落中游。荷蘭前鋒亨特拉爾左眼受傷嚴重，雖然話趕得切復出，但狀態始終成係疑，加埋阿費利同內田篤人都受傷，戰力大打折扣，今場敗走土耳其機會極大。
史浩克作客靠唔住

‧史浩克04近8場作客不勝

‧史浩克04今季歐聯未輸過

‧加拉塔沙雷聯賽主場取得7勝2和1負
史浩克歐聯多波入吼大

加拉塔沙雷有杜奧巴、史奈達雙雙來投，大大提升攻擊力，不過佢哋防守就始終唔掂，6場歐聯分組賽只係得1場可以保住清白之身。對手史浩克04就6場歐聯分組賽都有波入，火力同樣有保證。翻查記錄，史浩克04喺前年打入歐聯4強嗰陣，6場淘汰賽當中有4場開大，可見佢哋唔會因為打淘汰賽而變得保守。既然雙方火力十足，1.95倍入球大抵玩。
歐聯賽制

採主客兩回合淘汰制，今輪為16強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊憑作客入球優惠晉級，若加時仍然沒有入球，則需互射12碼決勝。
頂占筍盤：加拉塔沙雷（上盤）

猪拉多纳