寶正勁田園名駒官仔骨骨巧龍

猪拉多纳

　　今日10場B欄田草賽事，賽道有偏差，排檔好及前中置跑法賽駒，有着一定優勢。而今日較多全熱門，贏唔贏得晒？真係要逐隻秤，如果部分嚴重低水，未必博得過。

　　「寶正勁」性能狹窄又唔叻，四班直路賽屬最理想平台，膽材。「田園名駒」賽前大力準備，大閘及拍跳做到出晒樣，擺明搏今場。「巧龍」轉馬房後稍有進步，「挨身挨勢」問題有改善，邊線分子。「官仔骨骨」走唔走樣冇得估，可爭卻非博W對象。「翡翠明星」情況差不多，限於拖腳。

　　「團圓飛舞」前仗跑完已經跟進，加程入Q，證明有實際作用，今場步速唔慢，仲啱追。「八飛」及「好好運」，俱有實力，排檔一內一外，前駒略秤先。「飛天龍駒」屬今場少數兩W在手之馬，級數夠。「辣得醒」賽事形勢夾，跑短200米則有點擔心。「幻想家」總係跑唔番。「領航精神」外檔恐早段被迫走大外叠，但若果楔得好，直路鬥檻唔輸蝕。

　　「吉祥」今季早已改善了急口及走規問題，尤其落四班重跑此程，將會復現強大競爭力，排到好位更有利跑法。「醒目波幅」轉彎路程成了障礙，就算試大閘好乖，落場跑未必一樣，有質亦只宜作配。「馬龍王子」上場略失望，草地賽能力也有疑問，限爭腳。「奀皮仔」情況近似。「勝捷勝」退出後操練未有間斷，希望冇大影響，而上賽轉配備及縮程有突破，如表現持續，三甲分子。

　　「愛眼光」及「歡惑」，剛仗串Q，有賽績支持，惟前駒加了磅，後駒排外檔，均有風險，過熱要小心。

　　「金鎗俠」12月尾曾缺課，之後兩個月正常番，希望冇影響。「皇仁威龍」轉跑法有用，14檔如決心搶前，仍有機會享受慢步速。「牛精仔」漸有留意價值。

　　「幸運全勝」換了一批比近兩仗較弱對手，直接提升威力，不過，加磅多係憂慮。「魅影蹄飛」及「金湶」，排外檔係優勢，正路配腳。

　　「江山如畫」多馬搶，2檔不易迅速外移；「御鋒」面對同一難題，如克服到，尚可爭P。「卓爾名駒」轉直路賽比轉彎路程合適。「金笸籮」腳傷唔知有冇後遺症。

　　「品學兼優」雖然仲係生，但一場叻過一場，加程而戰，配合轉變中性能，係時候出頭。

　　「喜發龍」此程未必更好，只係少馬揀，才拖。「感恩」情況則相反，且好位令跑法略為進取，效果有好冇壞。「超光越影」重磅令能力下降，限爭位。「常盈多」唔使再受制谷草賽道，轉場有轉機。

　　「加州萬里」由1600米轉戰此程，威力得以重現，賠率過熱則難免。「滿綵」好開，實力卻與前駒有距離。

　　「花月春風」連搏兩場，希望保持到。「續領風騷」睇準備落點在今仗，場地正常的話，可爭三甲。「魔法幻影」及「陽明飛飛」，一匹失準、一匹路程掹掹緊，止於一位。

　　「牛精好友」近兩仗獲WQ有進步，如果今場有步速，沿用守好位跑法，威力仲大。

　　「旗幟鮮明」腳傷過有陰影，有質亦限作配。「卡加大師」早段步速夠快，外檔及後上跑法唔會失利。「戰士」唞夠及回跑此程，安排實際，大大提高機會。「光輝之星」久唔久跑場好，冇穩定性可言。「名舵主」分盡，又冇磅減，難睇好。

　　「隨心隨意」和「神聖火炬」，一對年青好手，前景秀麗，負輕磅減輕升班壓力，頭馬非此即彼。「喜蓮芳芬」及「綠色威」，三班勁旅，唔怕重磅，係怕形勢唔利追而已，好在是賽應有步速，唔難交出成績。「豐衣足食」回到此程總比角逐較長路程實際，如場慢仲好。

　　「勁勢」換人跑，效果至少唔差得過上手，起碼會畀足心機！而按照前仗是但跑一樣有P，輕磅在二班可贏。

　　「海鑽石」及「勝利之星」，一對摩廐馬，各有可取之處。「綠色快駒」一班有壓力，二班唔同計法。「夢仙」和「芙蓉之寶」，此程冇短途咁好跑。「匯聚力量」已露光，冷門可敲。