得男二班冇對手

猪拉多纳

　　第九場二班1200米泥地。「小宇宙」今季跑4場，三度入Q，均在1200米路程，田草2次、田泥1次，當中試過唔同跑法，守好位冇問題，自己帶以及留後追一樣得，無疑多場搏極未贏，勝在穩定性強，而今仗排到內檔，因利乘便，預期跑法變回主動，唔使好似大前仗焗留，直接增強威力。雖然今仗距上賽只係兩個禮拜左右，唔似得之前約1個月跑1場，喼唔喼到演出水準？如果參照上季的話，密密跑冇話唔掂（連續4仗係兩周跑1場，成績為2W2Q），何況，摩廐馬一日未交代，通常唔會走樣，難得今仗條件優厚，唔應該縮槓。

　　第十場二班1800米草地。「得男」季內甚少冇貨交，唯一冇P在前仗同程，因為頭三段真係慢得「恐怖」，先至完全冇得追（比較起上場慢了3秒7）。事實上，剛賽步速正常番，末段話過就過，唔係直路早段兜來兜去，點只贏1個身位？今仗繼續在二班跑，好多對手輸過晒畀佢，本身加磅唔係多，估計後勁依然咁爆得，假使步速唔係慢到癲，末段唔易有對手鬥得過佢。