超皇鷹全力衛冕

猪拉多纳

　　今日禮拜六沙田跑馬，十場泥草混合賽，問心嗰句，有好幾場真係無從入手，點睇都係得一個字，亂！所以，今期揀邊場玩，真係要格外留神，而注碼上亦要控制，點都要縮番啲，無謂浪費子彈。

　　第二場四班1600米草地。「數糊傳奇」唔係中短途馬，之前能夠在直路賽1000米及1400米跑得接近，只係質素搭夠，今次終於增程至1600米，配件又有變動，係出於好意，若然今場有得追，此馬後勁可派用場。

　　第八場三級賽1400米草地。「超皇鷹」乃上屆盟主，今屆再跑，有心衛冕，睇匹馬上場走勢，唔係直路連番受困，一定有三甲，推算狀態起得八八九九，而有埋上場熱身，嚟到今場時間夾得啱啱好。只要人馬發揮到水準，直路唔係斜跑太嚴重，將有一爭之力。

　　小宇宙形勢有利

　　第九場二班1200米泥地。「小宇宙」今季跑來跑去未贏到，田草及泥地賽，多輸在對手強，以及冇運。今次有番啲運仔，對手唔叻、排到好位，點會唔把握機會，跑出水準，有資格坐正。