禾堡氹fans大力起「塞」

猪拉多纳

德甲獨腳戲禾夫斯堡主場對杜塞爾多夫，禾堡質高態勇牌面秤先，不過呢班波主場表現差過作客，加上人腳唔齊，主Ｗ得1.68倍唔算值博，既然兩軍近期都有前冇後大踢進攻足球，不如撐1.85倍大盤。

（有線64及203台周六凌晨3時30分直播）

禾堡上仗作客大炒弗賴堡5比2，5個入球仲包括維爾連亞嘅開齋世界波同奧歷嘅精彩倒掛金鈎，全隊狀態返晒嚟，演出令人賞心悅目，不過今場中堅拿杜同基傑亞高斯分別因傷病缺陣，中場比列錫同迪亞高亦分別傷停，人腳唔齊。球隊今季踢咗12場主場賽事僅兩勝，主場成績排德甲尾二，難怪新任經理K阿羅夫斯賽前呼籲球員放鬆心情享受比賽，希望壓力較細下喺主場踢番場好波，安慰失望咗好耐嘅球迷。
杜塞爾多夫作客入到波

杜塞爾多夫今季演出較預期好，目前護級壓力唔算大，球隊最大弱點係作客搶唔到分，近9場聯賽作客1和8負曳到極，不過勝在鬥志好，就算輸都唔難睇，近期作客對多蒙特、慕遜加柏、史浩克同拜仁呢啲強隊都有波入，攻擊手比連侯辛、列辛加同羅比古斯都有態，雖然今仗有中場奧利華芬克同隊長林拔斯缺陣，但對攻力影響唔算大。首循環對賽禾堡作客贏4比1，今仗入球預期都唔會少。