阿仙奴爭前4 唔放過雷丁

猪拉多纳

歐聯、足總盃出晒局，阿仙奴今季繼續令人失望，但係亨格比利認為兵工廠仲有個未完成嘅任務，就係要爬宿敵熱刺頭搶番個「四哥」位置，今晚對住護級分子雷丁肯定冇情講，1.55倍「讓球主勝」趁熱食。

（有線203及303周六晚11:00直播）

睇番聯賽榜形勢，阿仙奴暫時落後熱刺4分但踢少場，領隊雲格賽前已經落咗「柯打」，話希望班手足盡力爭入前4，就連左閘蒙利爾都話唔可以畀同市宿敵熱刺騎住衝線，有晒目標自然鬥心十足。
戴亞比韌帶撕裂提早收咧

雖然阿仙奴官網昨晨爆出一單噩耗，就係戴亞比操練嗰時韌帶撕裂要抖8至9個月，加上韋舒亞足踝傷未好番，將會聯同肌肉撕裂嘅翼鋒禾確特齊齊缺陣，但係基奧特同辛迪卡索拉呢排腳風咁順，要砌低雷丁綽綽有餘啦！況且兵工廠近況好番好多，最近5場聯賽贏足4場，早排歐聯作客贏拜仁慕尼黑2:0更加係代表作，食住個勢有望繼續贏。
新帥艾堅斯識攻唔識守

目前排尾二嘅雷丁聯賽5連敗，會方喺禮拜三正式聘用艾堅斯做新領隊，佢嘅首要任務梗係帶領班波逃出生天啦，呢位前修咸頓領隊嗰套戰術係就係夠晒娛樂性，但有前冇後嗰下弊呢，你去到酋長球場同阿仙奴鬥攻咪盞送死！再講吖，雷丁最近11次鬥兵工廠都輸晒，擺到明畀呢支倫敦球隊剋死，預期艾堅斯嘅雷丁首Show應該會輸得幾轟烈！