曼市打吡 「大」打出手

猪拉多纳

宿敵對碰出盡法寶

今晚英超上演「曼市打吡」，曼聯主場對曼城，玩1.65倍入球大就最實際。事關紅魔有朗尼傷愈復出，火力提升，最重要係曼城家陣落後15分，想翻身今鋪一定要喪攻求勝，希望吊吓鹽水，咪忘記兩軍近年碰頭好似火星撞地球咁開「大」片，一於食住花生等睇入球騷啦！

（有線200、300及廣東體育周二凌晨3:00直播）
耶耶托尼續新約搏命

依家曼聯以15分騎住曼城，計埋今場雙方得番8場聯賽要踢，假如曼城今場輸埋，睇怕都可以提早扯白旗，諗定下季點組軍。正因為咁，「藍月亮」領隊文仙尼一定會出盡法寶開猛火，全力阻止紅魔贏波。事實上，曼聯有鼠蹊受傷缺陣兩場嘅射手朗尼今晚復出，加上中場香川真司上仗對車路士連1分鐘都冇得踢，眼光光睇住球隊喺足總盃出局，今鋪有機會擔正，同尹佩斯及朗尼重組喪攻鐵三角，當然會搏到盡。

賽前有消息話，曼城翼鋒拿斯尼、隊長高柏尼齊齊唔妥文帥，當中高柏尼係因為唔滿意「文仔」阻止佢代表比利時出戰，好可能選擇跳船去拜仁慕尼黑喎，呢單嘢如果係真嘅話，咁曼城條防線都幾牙煙。咁「藍營」嗰邊都唔係齋得壞消息嘅，中場猛將耶耶托尼已經落實續約4年，傳聞周薪加到22萬鎊下半世唔使憂，只要佢心情靚肯搏，配合射手泰維斯同中場大衞施華，根本唔使擔心曼城冇波入。
曼城近7次交手5開大

睇番對賽往績，曼城已經連續7次喺打吡戰有士哥，期間有5場開入球大，幾乎每次都要掃低對方至心息，何況賽前文仙尼又口硬話，其實曼城同紅魔嘅實力差距，絕對冇15分咁多，為咗保住僅有嘅面子，佢點都唔會甘心喺奧脫福球場輸波，特別係近日有消息話，摩納哥老闆打算用高薪撬佢過檔，為咗多條後路，今場點都要好好睇睇至得。
兩軍交手平均入4.6球

‧兩隊近5次碰頭有23個入球出現，平均每場4.6個入球。

‧曼聯今季聯賽領先有25勝2和，曼城領先則有18勝2和。

‧紅魔喺聯賽已經連續627分鐘冇失波。

‧曼城今季有25%失球被對方喺禁區外射入。
英超星期一旺紅魔

曼聯今晚對曼城，除咗入球大抵玩，讓平半嘅上盤都值得跟進，事關紅魔過去50次喺「英超星期一」出戰，總共有36勝10和4負，得勝率達到72%，不敗率更加係有92%，家陣嚟到爭標關鍵戰，當然會加多兩錢肉緊，1.9倍上盤真係幾抵玩o架！