多蒙特「-1」撳住搶

猪拉多纳

馬拉加闖蜂巢難甩身

歐聯8強戰次回合，多蒙特主場迎戰馬拉加。從首回合馬拉加主場和0比0戰況所見，作客嘅多蒙特佔盡上風，兩軍目前實力、狀態都有相當差距，客軍今仗仲有中後場兩大骨幹停賽，連穩守本錢都冇埋，作客「蜂巢」西法倫球場難捱，黑柴相信多蒙特唔只贏一粒，推介1.9倍「讓球主勝」。

（有線62及202台周三凌晨2時45分直播）

「蜜蜂兵團」多蒙特今季雖然失落德甲錦標，主因只係實力超班嘅拜仁慕尼黑終於振作，多蒙特本身級數同表現並冇退步，而且一眾年輕新星更見成熟，喺大戰場合演出尤其可靠，正如本報球評家黃興桂所講嘅「全場搶迫，必創佳績」，多蒙特經常都可以做到呢點，所以贏得晒今屆所遇強敵拜仁、皇馬同曼城嘅尊重。

多蒙特首回合作客馬拉加表現同形勢都明顯係較佳一隊，可惜馬里奧葛斯同羅拔利雲度夫斯基多次門前失機，教練高普喺首回合賽前亦部署失當，為咗唔想畀拜仁喺德甲提前奪標，之前作客史特加都傾盡全力，搞到首回合下半場體力不繼，最終只和波收場。
馬拉加兩防中停賽

不過高普受過教訓後已學精，上周末聯賽對奧格斯堡一役收起咗大半隊主力，蓄銳等今場，相信絕對有條件做到「全場搶迫」。

馬拉加主帥比歷連尼當然亦知道「全場搶迫」嘅道理，但佢手上並冇咁嘅籌碼，陣中球員大部分都已經走下坡，今晚正選當中超過半數年過30，一隊波有一、兩名老將係寶，但大部分都係老將就好擇使。

佢哋根本冇足夠體能抵擋多蒙特嘅壓迫，比歷連尼上仗縮窄防線，前面只留番沙維奧拿，結果幸保不敗，但今仗兩名防線骨幹，智利防守中場伊度拉同巴西中堅維列頓雙雙停賽， 要由兩位年屆32嘅中堅迪米捷利斯同盧根奴拍檔，去到西法倫球場好難頂。
比帥奔喪影響備戰

加上馬拉加近日黑氣纏身，上仗聯賽作客皇家蘇斯達途中，所乘坐嘅飛機遭到雷擊，球員嚇餐飽，搞到輸波收場。同時教練比歷連尼收到噩耗，其父不幸逝世，比帥要返智利出席喪禮，之後一個人飛去德國同大軍會合，但已比球隊遲一日抵步，進一步打擊備戰工作，故今仗馬拉加實在難以睇好。
數讀歐聯

（1）馬拉加於今屆歐聯只曾1敗，16強首回合○比一不敵波圖

（2）多蒙特近6次對西班牙球隊只輸過2次，其餘為1勝3和

（3）多蒙特於歐賽歷史上曾3次在首回合兼作客環境下打和○比○，在次回合皆可勝出

（6）兩支球隊剛於本土聯賽總入球同樣開出6個
出線條件

多蒙特晉級（1.26倍）

‧勝

‧和0:0，需要加時

馬拉加晉級（3.45倍）

‧勝

‧和0:0，需要加時

‧和1:1或更大比數和波

註：（）內為馬會晉級賠率