皇馬攞威 幾大奉陪

猪拉多纳

加拉塔沙雷主攻冧粉絲

歐聯8強次回合，皇馬作客加拉塔沙雷，3大理由捧大盤。1.C朗爭緊神射手獎。2.皇馬於西甲爭霸車尾燈都見唔到，歐聯場場要贏攞威。3.加軍主場球迷勁癲，班球員輸到開巷都會攻。喂大佬我有晒point，你唔係唔買大呀？

（有線61及201台周三凌晨2時45分直播）

睇勻8強4場戲碼，以皇馬、加拉塔沙雷呢個match up最冇得打。首回合「銀河艦隊」坐鎮主場，好似大人同細路仔踢一樣，早早已領先2粒，最後埋單贏3比0，只係皇馬班大帝收夠籌。次回合去到「地獄球場」，莫帥一樣會派C朗、奧斯爾、賓施馬等主力盡砌，咁搏為乜？要威囉。

皇馬喺西甲爭霸無望，當前最大目標，當然係要喺歐聯揮低巴塞。前屆8強對熱刺，皇馬首回合主場贏4粒，次回合去到白鹿徑一樣贏波。莫帥深知要爭標，必定要保持強勁氣勢，聯賽已經冇嘢好爭，歐聯唔通唔搏咩。
C朗爭金靴全力數胡

係人都知C朗勁自負，今季西甲衞冕失敗，聯賽入波數字又落後美斯成條街，當然唔老利。難得目前於歐聯射手榜帶緊頭，但只係head住美斯1粒，今仗C朗為個人榮譽，肯定會搏甩髀爭取士哥，對手防線曳，又點阻C朗個人表演？查實今場皇馬只有卡卡、沙治奧拉莫斯、沙比阿朗素缺陣，其餘攻擊主力都可悉數落場，作客照數胡。

加拉塔沙雷入到8強已超額完成，今圈抽中皇馬，教練泰林都冇晒計，首回合索性豁出去同強敵鬥攻，當然大敗收場。既然已輸緊3粒，次回合梗係谷埋佢啦，雖然神射手布拉卡爾馬斯須停賽，但仲有杜奧巴壓陣，皇馬大幅領先下，畀「魔獸」偷到雞唔奇。再加上有一班瘋狂粉絲熱烈打氣，班球員想hea都唔敢啦，萬一佢哋睇唔順眼，放火燒咗個球場咁點算呀！
數讀歐聯

（12）加軍於12年後首次殺入歐聯8強，當時對手都係皇馬

（3）該仗首回合，加軍主場攻入皇馬3球，贏3比2

（1）本屆加軍4次主場出擊，僅贏1次

（6）莫連奴6次帶隊踢歐聯8強，最終全數晉級

（30）今次係皇馬第30次進身歐聯8強
出線條件

皇家馬德里晉級

‧勝或和

‧以一球或兩球差距落敗

‧以三球差距落敗，但取得作客入球

‧輸0:3，需要加時

加拉塔沙雷晉級

‧淨勝四球或以上

‧贏3:0，需要加時