土耳其球迷唔該克制

猪拉多纳

土耳其球迷向來都係麻煩友，上星期當地有電視台預測皇家馬德里會喺歐聯八強首回合贏加拉塔沙雷，就有班加拉粉絲憤而走去電視台門口威脅搗亂！今晚次回合輪到加拉塔沙雷主場，可想而知屆時現場氣勢有幾勁。

加軍首回合落後三球，證明兩隊實力有明顯距離。加拉陣中雖然不乏球星，不過全部過晒氣，「杜奧巴，很想去捕捉他……」呢支歌仔已經唔啱唱，因為以皇馬嘅穩陣後防，要捉杜奧巴都唔太難。呢位射手喺「土超」仲有貨賣，但始終走過「中超」一轉，已經無上屆咁厲害，而咸美艾天托普、史奈達等等，狀態亦唔喺頂峰，仲有今場最頭痛嘅，係有八個歐聯入球嘅主力射手布拉卡爾馬斯同埋主力中堅魯基奧要停賽，人腳不整下，睇怕都係得番個「地獄主場」氣勢嚇吓人！
攻守主力停賽影響大

皇馬教練莫連奴喺剛過去聯賽收起C朗、迪馬利亞、奧斯爾等做後備都贏利雲特5:1，下半場C朗至入替都有波入。雖然預計C朗都會喺今晚陣容之內，連同基迪拉、奧斯爾、迪馬利亞等等都會出場，但中場沙比阿朗素及沙治奧拉莫斯停賽缺陣，削弱咗中後防實力，踢落又未必會好似首循環咁得心應手，不過加拉塔沙雷出局只係時間問題，希望佢哋班球迷克制啲，唔好喊打喊殺啦！