皇馬落地獄做「細」界

猪拉多纳

加拉地頭發惡唔守點得？

今晚歐聯8強次回合，加拉塔沙雷喺「地獄主場」恭候「銀河艦隊」皇家馬德里。首回合皇馬喺主場3:0大勝加拉塔沙雷，進身4強機會高唱入雲。不過加拉作客巴拿貝都夠膽同皇馬鬥攻，今晚返到「地獄球場」當然唔會手軟，有望憑住主場氣勢同狀態大勇嘅杜奧巴攻堅，逼到皇馬玩守勢波求穩陣出線，2.35倍入球細抵捧。

（有線61、64、201及203、中央5台周三凌晨2:45直播）
巴拿貝照攻返主場冇手軟

加拉塔沙雷喺1月先後羅致富有歐聯經驗嘅杜奧巴同史奈達，證明球隊有決心喺歐聯幹一番事業，就算8強首回合對皇馬大敗嘅局面難以扭轉，但剛啱喺土超梅開二度嘅「魔獸」杜奧巴，點都想做番場好戲證明自己嘅卡士，肯定唔會輕易認輸。既然加拉作客都敢同皇馬對攻，返到主場又點會變得保守先？
比比受傷艾比奧爾頂上

反而有3球在手嘅皇馬為咗穩穩陣陣晉級，相信都唔會太大貪想大炒多一場，當然會以主守打法應付加拉啦！雖然「銀河艦隊」首回合領先3球之後，有沙比阿朗素同沙治奧拉莫斯成功「洗牌」，今場需要停賽，原定空缺由比比同莫迪歷頂上，點知尋日最後一課操練，比比腿肌受傷，今日或難披甲，可能要用華拉尼、艾比奧爾打雙中堅。

既然皇馬有3球優勢喺手，根本唔需要刻意搶攻，相信「寸王」莫連奴今場部署都係先求不失，有機會先打反擊爭取作客入球，同埋肯定會叮囑班球員避免攞牌同不必要受傷，以免打亂往後嘅部署，踢落就住就住又點會多入波吖，今晚個入球細真係穩陣到極呀！
加拉主場近8戰僅1敗

‧加拉塔沙雷近8場主場賽事得1敗。

‧主隊近10場主場賽事得2場失多過1球。

‧皇家馬德里近8場只得1場失多過1球。
皇馬難贏波博加拉「主勝」

加拉塔沙雷主場非常硬淨，就算預咗會喺8強止步，相信都唔會咁易畀皇馬贏波晉級，以加拉嘅鋒力未必可以開得成入球騷。但唔好忘記「銀河艦隊」喺分組賽對住曼城同多蒙特嗰陣，都試過受制主場威力，結果失分收場，客軍為求穩陣打入4強，分分鐘只係求和，甚至可能畀加拉偷雞成功，2.35倍「讓主」都值得捧。
張峰來料：加拉塔沙雷（入球細）

首回合：加客負0:3
歐聯賽制

採主客兩回合制，今輪為8強次回合，設作客入球優惠，若未分勝負於次回合法定時間後加時30分鐘，再和則互射12碼決勝。