多蒙特狂轟馬拉加

猪拉多纳

主場失波就一身潺

多蒙特今晚喺歐聯8強次回合主場迎戰馬拉加，兩隊首回合互交白卷，多蒙特為免出現有比數和波輸作客入球被淘汰嘅局面，小弟信「蜜蜂兵團」今場會以強大火力轟爆馬拉加，1.9倍「讓球主勝」值得捧場。

（有線62及202周三凌晨2:45直播）

多蒙特首回合作客馬拉加其實踢得唔錯，係爭啲運先贏唔到。比賽過程中見到「蜜蜂兵團」的確係技高一籌，中場馬里奧葛斯一個已經搞到馬拉加守衞氹氹轉，多蒙特喺呢位德國國腳指揮下攻勢水銀瀉地，兼且羅拔利雲度夫斯基同馬高列奧斯個個都係射得之人，今場只要繼續踢得番呢個水準，馬拉加都幾難偷雞！
蜜蜂兵團歐聯主場全勝

唔好忘記，多蒙特今屆歐聯分組賽主場連贏阿積士、皇家馬德里同曼城，仲壓倒皇馬以小組首名出線，上一圈又喺主場大炒薩克達3蛋，今屆歐聯主場全勝，絕對唔嘢小。啱啱上周六佢哋對奧格斯堡嗰場德甲已經留晒力，今場可以用最佳狀態爭取贏波。

其實小弟都好欣賞馬拉加，即使佢哋飽受財政問題困擾，仍然可以專心比賽，仲殺到嚟歐聯8強！其中艾斯高更加係全歐矚目嘅超新星。不過嚟到關鍵嘅歐聯大戰，經驗絕對係更重要，最慘係佢哋主帥比歷連尼丁父憂日前飛返智利奔喪，就算趕得切返嚟，備戰工夫難免受影響，對於以新人為主嘅馬拉加嚟講難免輸蝕，佢哋今屆歐聯之旅睇怕會喺今晚行人止步。
多蒙特主場必入波

‧多蒙特連續12場主場有波入。

‧多蒙特4場歐聯主場全勝。

‧馬拉加近5場作客只得1勝。

‧馬拉加連續10場作客有失球。
1.62倍入球大抵玩

蜜蜂兵團連續5場主場比賽都至少射入3球，今仗仲有「三叉戟」齊齊上陣，以咁嘅狀態同人腳想喺主場入多啲波真係唔難。對手馬拉加亦連續2場作客開大，隊中亦有沙維奧拿、艾斯高等一流戰將爭取入球，但佢哋防守甩漏唔少，已經連續10場作客未能保住清白身，1.62倍入球大捧得過。
頂占筍盤：多蒙特（讓球主勝）

首回合：多客和0:0