拜仁逼斑馬擺和頭酒

猪拉多纳

Lead住兩球 梗係死守

今晚繼續有歐聯8強好戲上演，「斑馬兵團」祖雲達斯會返主場同拜仁慕尼黑再續前緣。有睇首回合嘅朋友，都知戰情係幾一面倒，如果拜仁把握力同運氣好啲點止贏2:0吖！不過祖雲達斯假假哋都係意甲班霸，今季主場出擊亦都靠得住，想反勝出線固然難度大啲，但要保住不敗攞番些少面子應該冇問題，和波有3.35倍玩得過。

（有線62及202周四凌晨2:45直播）

祖雲達斯落後緊兩粒，如果想博翻身，除咗要入兩球以上，先決條件就係唔好再失波，幸好祖雲達斯條防線夠晒硬淨，今季「老婦人」23場主場賽事只係輸過兩場咁大把，當中仲有14場波保持清白之身，齋計歐聯4場主場賽事更只係失過一球咁大把，強如衞冕嘅車路士作客去到祖雲達斯新球場都要吞3蛋，去到16強兩回合計又輕描淡寫請些路迪吔5隻光蛋，所以拜仁想雙殺祖記並唔係話咁易。
拜仁如贏歐聯 森馬做80下掌上壓

雖則話拜仁鋒力都唔曳，上周六仲喺德甲提前封王，而且定喺5月11號今季最後1場主場聯賽對奧格斯堡，領取冠軍盾，下一個目標就係重奪歐聯。之不過咁喎，佢哋喺16強首回合試過大勝阿仙奴3:1，次回合返到安聯球場可以走晒樣淨吞兩蛋，加上今晚作客情況下守得和都出到線，又點會同你搏錘吖？

據《圖片報》講，承諾如果拜仁攞歐聯就會做80下掌上壓嘅體育總監森馬，禁止咗一班手足响剛啱個星期日晚，幫4月1號30歲牛一嘅列貝利補開生日Party，要咁樣勒住班球員，證明呢班戰將重奪德甲錦標之後，戰意真係有少少鬆懈！再講吖，查實拜仁上場聯賽1:0小勝法蘭克福都幾抿水，攻擊中場卻奧斯又養緊傷，或多或少會影響前場組織力，實會叠埋心水死守，今晚冷敲和波好路呀！

首回合：祖客負0:2