蒙特雷熱唔透捧銀河

猪拉多纳

唔知點解中北美洲冠軍盃咁受到足智彩重視，無論晉級、冠軍賠率一應俱全，更同歐聯一樣早於周一中午已經受注，未知能否吸引大家捧場。

過往一直提及中冠盃係墨西哥球隊天下，今屆美職軍團已經算叻，有兩隊能殺入4強，西雅圖海灣者更於8強淘汰來自墨西哥嘅堤格雷斯，不過喺準決賽又打回原形，花旗兵於兩場「美墨對碰」都喺主場輸波，蒙特雷對拿根亞嘅墨西哥決賽組合，似乎會連續兩屆出現。

首回合領先2:1嘅衞冕球隊蒙特雷，喺聽朝上演嘅中冠盃4強次回合會返主場再戰洛杉磯銀河，筆者雖認定佢哋出線在望，但就唔多睇好再添食，事關睇番8強戰，蒙特雷正正就係作客領先首回合後，次回合僅和波過關，再睇埋賠率，今朝另一場中冠盃嘅極類似對碰，首回合作客擊退西雅圖嘅拿根亞，主W熱到得1.34倍，反觀蒙特雷有1.55倍似乎熱唔透，建議捧2.25倍「讓球客勝」。

（開賽時間：周四早上10:00）
足球重心：洛杉磯銀河（讓球客勝）、泰拉克托（勝）

馬膽推介：3場（8）金湶

近期再唔係獨孤一味靠放，上次跑直路1000米就可以緊守好位贏馬，表現再有進步，今仗排5檔進可攻退可守，同場當銳馬唔多可以再捷。

首回合：蒙客勝2:1