拉素傷兵滿營捧費倫巴治

猪拉多纳

今晚歐霸盃8強次回合有拉素主場鬥費倫巴治，首回合10人應戰嘅「藍鷹」慘負0:2，今場當然想逆轉啦，但佢哋喺意甲同羅馬大戰過後傷兵滿營，莫講話大炒晉級，家陣連想贏波都難呀，都係捧1.93倍「讓客」，撐費倫巴治頂得住唔輸啦！

（有線61及201周五凌晨3:05直播）
閉門作賽士氣曳

論實力，費倫巴治可能唔及拉素，不過主隊啱啱先喺「羅馬打吡」惡鬥完死敵羅馬，贏唔到波之餘仲搞到元氣大傷，王牌前鋒高路斯、中場靴蘭尼斯同埋後防主力史提芬拉度全部受不同程度傷患困擾，就算踢得狀態都肯定唔足，加上「藍鷹」嚟到次回合仲有上場領紅嘅奧根耶奧拿斯同埋莫利停賽，咁多主力非傷即停，唔係諗住今場仲可以上演「大逆轉」出線吖嘛？

仲有，唔好唔記得拉素之前因為球迷成日喺歐洲賽搞事，家陣被罰閉門作賽，冇球迷喺度打氣，士氣肯定會爭好遠啦！而且費倫巴治揸住兩球優勢喺手，一定唔會同拉素鬥攻，加埋客軍近10場作客得1場輸波，今次銳意死守嘅話，絕對有能力保不敗，歷史性首次晉級歐霸盃4強o架！

首回合：拉客負0:2