貝迪斯主鬥西維爾例少交收

猪拉多纳

西甲獨腳戲上演塞維利亞打吡，由貝迪斯主場鬥西維爾，西維爾首循環曾大勝5比1，今場大盤仲有1.85倍，真係有冇咁筍先？西維爾主場一條龍，但喺客場只係一條可憐蟲，佢哋今季聯賽作客平均每場入唔到1粒，呢場預期入波唔會多，捧入球細！

（now 632周六凌晨4時直播）

西維爾攻擊陣容豪華，前面由西班牙星級射手尼格度擔正攻堅，喺佢身後仲有兩大進攻中場雷恩斯同拿傑迪錫支援，呢個進攻鐵三角相當有睇頭。佢哋首循環主場對貝迪斯發揮理想，雷恩斯同拿傑迪錫加埋貢獻咗3粒，連守將法斯奧都梅開二度，搞到貝迪斯尷尬大敗1比5，睇落真係完全冇得打。
作客腳軟唔識入波

不過，西維爾係正宗門口狗，離開自己地頭戰鬥力頂盡得番5成功力，大軍今季聯賽作客15戰僅贏1場，勝出率不足7％，單計客場成績位列西甲尾二，真係見到都驚，今場就算平手盤都揀唔落手！加埋佢哋聯賽作客15戰僅入12球，可見佢哋喺客場根本組織唔到攻勢，尼格度唔係美斯，要佢孤軍作戰幾難有貨交。

貝迪斯目前排聯賽榜第7，仍有機會爭歐洲賽席位，但呢類中型班冇乜野心，依家反而要猜度幕後人有冇心進軍歐洲。貝迪斯最近水準飄忽，早前鬥華倫西亞同基達菲死火冇波入，上場失驚無神轟入5球，認真難捉路！據往績顯示，佢哋近5次主場對西維爾不勝，5戰僅入1球兼全細，跟番呢條攤路，可試細盤。