幸運勇士換人搏

猪拉多纳

　　賭博士昨日講過，韋達停賽期間，不代表潘頓便有力代之而興，皆因老蔡與韋達同氣連枝，拍檔有難，神仙一定出力打救。也許可以預期，每逢蔡廐馬遇上潘頓之場合，必然加多兩錢肉緊，目的一字咁淺，就是要截擊潘頓！

　　故事推敲下去，潘頓如欲突圍而出，最佳辦法唯有捨難取易。所謂取易，意指避開蔡廐馬場合搏殺，如明日第二、三場賽事，恰巧沒有蔡廐馬列陣，同場對手也普遍是中下游倉口之馬，誠是潘頓起革命良機！

　　細心觀察，原來「幸運勇士」上仗由韋達搏失，今次幕後搵潘頓接手，目的顯而易見，無非貪其鬥志旺盛，潘頓為挫對手銳氣，臨場定必悉力以赴。事實上，「幸運勇士」與潘頓最為合拍，人馬合作曾五度入位，如今故劍重逢，兼喜獲黃金一檔，唔搏就假！

　　再講第三場「你知我贏」，前仗也由韋達騎過，可惜該役跑第五名，又是得個近字。今仗馬兒初降四班，計級數傲視同儕，適時扳用潘頓，破悶局決心昭然若揭。上仗此駒休息個多月復出，首度吼谷草登場，用意無非試馬，今次有備重臨，要看高一線。