巴塞3.7倍「讓和」仲抵玩

猪拉多纳

美斯養傷「薩」氣減

今晚巴塞隆拿喺西甲作客薩拉戈薩，喺聯賽榜榜首領先緊13分嘅佢哋，當然要畀有傷嘅美斯仔抖抖啦，雖然「地上最強」要贏波冇問題，弊在連場大戰過後元氣大傷，「球王」又缺陣，想大炒絕對唔容易，不妨冷敲3.7倍「讓和」，博巴塞煲魚生粥啦！（now632台周一凌晨1:00直播）
薩拉戈薩中場大將復出

美斯喺歐聯8強次回合後備上陣只係「企住踢」都成功幫巴塞扭轉敗局，唔止因為「球王」單腳踢波都超班，心理影響更係非常關鍵，佢單係出現喺球場已經可以令隊友嘅信心返晒嚟，同時令對手騰晒雞，證明巴塞真係冇咗佢唔得o架！應付完歐聯大戰嘅巴塞眾將相信未必趕得切恢復體力，而且美斯唔踢，贏波係就係冇問題，但以佢哋近7場作客得1勝嘅戰績嚟睇，實在令小妹唔敢睇好可以出現一面倒嘅勝局。

巴塞今季最大嘅問題之一係防線唔穩陣，作客更已經連續11場失波，相信同年事已高嘅佩奧爾頻頻受傷大有關係，由於馬斯真蘭奴都唔出得，今場要靠布斯基斯「客串」中堅，唔多似可以保住不失。至於主隊薩拉戈薩就有中場主力艾邦奴復出，加埋前鋒普斯迪加狀態一直唔錯，隨時有機會喺巴塞身上偷雞入波，即使輸都唔會慘敗。