祖雲達斯撲殺拉素

猪拉多纳

爭標直路踩油衝刺

今晚有場意甲獨腳戲，拉素主場對祖雲達斯，兩隊同病相憐剛於上周中歐洲賽出局，惟有專心踢好餘下聯賽。祖記喺歐聯遇上拜仁，明顯唔夠踢，但返回意甲始終超班，而對手拉素飽受傷兵及停賽問題困擾，實力大打折扣。「老婦人」正好趁機報番意盃被拉素淘汰之仇，向聯賽冠軍寶座進發，Mic少簡簡單單要1.75倍客W。

（廣東體育頻道周二凌晨2時45分直播）

祖雲達斯喺歐聯被拜仁慕尼黑「雙殺」出局，球隊上下都話輸得口服心服，對士氣冇乜影響。事實上，以祖記現時人腳想稱霸歐洲屬於奢望，既然歐聯已經出局，聯賽更加唔可以失，爭勝決心比之前更強。「老婦人」餘下最強對手，正係今仗鬥拉素及下輪對AC米蘭，只要能全取呢六分，冠軍基本上十拿九穩，點都要谷埋啖氣贏晒佢哋。祖記現時只有基奧雲高及基亞連尼兩位傷兵，仍有充裕人腳填補空缺，可全力搏殺。
拉素傷停後防穿窿

拉素早前喺歐霸盃同費倫巴治踢到飛沙劈石，最終飲恨出局，身心俱疲。值得一提係拉素近三仗有兩仗有球員被逐，連番以寡敵眾，體力消耗特別大。最大鑊係造成嚴重傷兵及停賽問題，三位後衞魯歷、古斯比比亞華與史堤芬拉度今場都要坐波監，另外兩位守將安德里戴亞斯及般奴彭利連拿因傷倦勤，後防人腳極之緊張，今仗更難抵擋祖雲達斯進襲。