廠仔搏命o趙拖肥

猪拉多纳

雲格落柯打爭8.3億Jackpot

英超今晚有關乎下屆歐聯入場券大戰上演，只要阿仙奴喺主場搞掂愛華頓，確保前3名殺入下屆歐聯嘅話，領隊雲格就有7,000萬鎊（約8.3億港元）超級Jackpot買人，點會唔搏命？何況雲格要保住領軍連續13年踢歐聯招牌，1.67倍主勝值得熱捧。（有線200及300、廣東體育周三凌晨2:45直播）
阿仙奴轉運5連勝

有睇日前直播，應該會認同阿仙奴喺主場以3:1反勝諾域治，運氣佔好大因素，如果唔係有個問題12碼，越位入波球證又睇唔到，真係睇唔出佢哋有咩本事完場前8分鐘內連入3球。不過咁，踢波唔係每場都要靠實力，或者英超聯賽會，唔係，或者連個天都想兵工廠繼續踢歐聯呢？畢竟連盃賽5連勝，好似連個天都鍾意佢哋喎！
阿迪達摸熟愛華頓

講真，阿仙奴係有福星照住o架，自從施捷斯尼被打入冷宮由法比安斯基守龍後，兵工廠就轉運連贏5場，依家只領先第4位嘅車路士1分兼打多1場，為鎖定前3名踢歐聯，然後用7,000萬鎊買晒德甲3寶羅拔利雲度夫斯基、馬里奧葛斯同施雲賓達，相信雲格會落柯打嗌球員醒定。

另一方面，愛華頓領隊莫耶斯都話明，今場目標係贏波，燃點出戰下屆歐聯嘅希望。不過最新消息話，莫耶斯好可能選擇結束捱窮日子，嘗試外闖執教有錢得多嘅史浩克04，相信愛華頓球員聽到，作戰心情點都會受影響。仲有呀，兵工廠中場阿迪達曾經係愛華頓核心，熟晒莫耶斯嘅戰術同部署，有佢帶住阿仙奴好易W。
兵工廠英超主場入球王

‧阿仙奴今季英超主場入球最多，16戰入42球。

‧阿仙奴連續5場開半場入球細。

‧兵工廠近8場聯賽得7勝1負，只曾不敵熱刺。

‧拖肥近5季作客交手得1和4負。
廠仔歎慢板捧半場細

雖然睇好阿仙奴贏波，不過對手愛華頓近況唔曳，連續4場聯賽不敗之餘，仲有3場係保持清白，而且兵工廠習慣歎慢板，未必會喺上半場全力搶攻，更加有利開半場入球細。事實上，雙方近5次碰頭，就有4場開半場細，證明大家都忌住對方，1.5倍半場細諗得過o架！