車仔冇油打吡捱細界

猪拉多纳

車路士剛於英足盃四強出局，今晚英超又要作客富咸應付倫敦打吡戰！車仔近年對賽往績冇優勢，加上經過連場大戰開始有疲態，富咸踏入○三年後演出回勇，就算輸波亦甚少大敗，今場首選入球細。

（有線303及203台周四凌晨3時直播）
近五次對富咸和晒

車路士連盃賽最近十次鬥富咸未輸過，不過當中有六次和波，包括最近五次，戰績上攞唔到任何甜頭。車仔由於要應付聯賽、英足盃及歐霸盃三條戰線，今場係佢哋今個月內第六場比賽，嚟緊周末佢哋仲要作客硬撼利物浦，下周又要應付歐霸盃四強首回合，任憑領隊賓尼迪斯點輪換，球員始終唔係鐵打，上場對曼城嘅比賽末段已經見到球員谷唔起，面對近況唔錯嘅富咸料會遇上一定阻力。

富咸一三年十二場聯賽一共取得五勝四和三負，不敗率逾七成，輸畀榜首雙雄曼聯、曼城無話可說，作客紐卡素亦係去到補時階段先被對手絕殺，表現其實唔太曳，而且呢三場敗仗都係輸「0：1」或「0：2」，就算富咸未能打破宿命贏波，預計戰情亦會非常緊湊，捧入球細啱數。