富咸要人唔要分 車仔客W好穩陣

猪拉多纳

有求於人，幾時都要低聲下氣。富咸今晚喺英超「倫敦打吡戰」對車路士，受讓都好難爆得出。首先車仔要搶分踢下屆歐聯，1分都不能少，其次富咸打算借用車仔門將泰拔高圖爾斯，睇怕踢緊風流波嘅佢哋唔敢做攔路虎，熱捧1.7倍客W着數。

（有線203及303周四凌晨3:00直播）
富咸想借藍戰士門將

車仔喺足總盃4強被曼城淘汰，的確有被屈死嘅味道，不過點都好，家陣車仔最緊要係保住聯賽前4名，確保拎到下屆歐聯席位，依家打少1場同第5位嘅熱刺同分，更加冇空間可以畀車仔玩嘢，即使近期賽程頻密踢到嘔，都要頂埋呢個地獄賽程至得，翻生嘅費蘭度托利斯可以同丹巴巴亞輪流掃射富咸後防。

對家富咸現時位列中游，踢歐洲賽唔使諗，降班又唔使擔心，對上兩場連環喺紐卡素同阿士東維拉身上失分，證明戰意散散哋。而且英國有消息話，富咸希望鍊贏修咸頓同韋根，借用現時被車仔借到馬德里體育會嘅比利時門將泰拔高圖爾斯，既然富咸贏同輸都冇所謂，陰謀論睇，唔會喺呢個時候同車仔過唔去囉。
車仔加利卡希爾 A高續抖

或者大家覺得，打吡戰富咸唔會立亂鬆章，但佢哋有中場杜夫、迪查加同馬哈馬度迪亞拉養緊傷，影響咪話唔細。另一方面，車仔都有中堅加利卡希爾同左閘艾殊利高爾未好番，不過佢哋後備力量強勁，絕對未至於冇人用，好似34歲嘅保羅費拉拿，其實都仲打得吓，就算打真軍都有本錢打爆富咸，熱捧客W穩陣。
車仔近戰旺開單

‧車路士連續9場比賽有波入。

‧車仔近6場有5場開入球單。

‧富咸連續6場對賽開入球細。

‧富咸近9場4次半場領先、5次打和。
車仔雙槍孭飛博開大

往績上富咸對車路士旺細唔旺大，不過咁，最近費托開始回復自信，丹巴巴亞要保住正選位置，絕對唔可以Hea踢，有佢哋幫手，車仔根本唔憂冇波入，1.72倍入球大值得扒逆水。特別係車仔近期防線唔算穩陣，唔夠時間備戰失波唔出奇，有機會連續5場開入球大！