國米死晒火 咬唔入雌狼

猪拉多纳

傷兵多兩件冇反勝本錢

正所謂黑開有條路，國際米蘭近期喺意甲連環失分，要爭來屆歐洲賽入場券愈嚟愈難，最慘係連長友佑都同加根奴都加入埋十字軍「大家庭」，大軍甩皮甩骨，今晚返到主場想喺意盃4強次回合扭轉劣勢唔容易，平手盤梗係捧近況大勇嘅羅馬啦！（now632台周四凌晨2:45直播）

國米近5場意甲輸咗4場，最近仲連環輸畀阿特蘭大同卡利亞里兩支中下游球隊，堂堂班霸來屆隨時冇歐洲賽玩都咪話唔醜死鬼。隊長辛尼迪賽前就呼籲班手足重新上路，點都要捧番隻意盃向球迷交代，講就容易，做唔做到先得o架？
長友佑都 加根奴坐底抖1個月

意盃4強首回合輸1:2嘅國米，前晚透過官網宣布咗單壞消息，就係喺對卡利亞里一戰傷出嘅翼衞長友佑都同防中加根奴，分別因為左膝半月板撕裂同右腳大腿拉傷要抖45日及1個月，消息可以話係雪上加霜，畢竟國米本身已經有迪亞高米列圖、卡斯辛奴同柏拉斯奧養緊傷，意盃次回合要靠35歲嘅洛基開飯？聽見都唔開胃啦！

相反羅馬最近就愈戰愈勇，近8場波只係輸過1場，上場聯賽贏拖連奴2:1場波，「雌狼」教練安迪亞索利仲特登收起迪羅斯，隊長托迪亦只係踢咗唔夠半場，擺到明留力今晚砌國米。

再講吖，由托迪同拉美拿組成嘅鋒線呢期着晒火，佢兩個最近6場波就合力炮製咗6個「士哥」，加上奧斯華度啱啱打破長達77日嘅入球荒，另一好波之人費奧倫斯傷勢亦都冇乜大礙，前線咁多好球員畀安迪亞索利調動，對住要焗攻嘅國米隨時有機可乘，平手盤捧羅馬可謂坐和望贏。

首回合國客負1:2
Data King

‧國米最近3次主場鬥羅馬都開「讓球客勝」。

‧雙方近6次交手，羅馬錄得3勝3和保持不敗。

‧羅馬最近8戰有5場開入球細。
意盃賽制

賽事採主客兩回合制，今輪為4強次回合。如兩回合計打和將計算作客入球優惠，未分勝負則於次回合法定時間後加時30分鐘，加時階段仍計算作客入球優惠，再和則互射12碼決勝。