流浪者 水手 爭做澳職「大」佬

猪拉多纳

澳職王者戰爆發！常規賽冠、亞軍球隊西悉尼流浪者同中岸水手果然喺決賽碰頭，夠晒合理。西悉尼流浪者首季參與澳職就入總決賽、中岸水手經歷欠薪風波死過翻生，無論邊隊捧盃都足以傳頌後世！既然呢兩班波鋒力強勁勢均力敵，最好就整番場「入球大騷」益吓班球迷啦！

（有線64及203周日下午2:00直播）
流浪者輕鬆練波減壓

呢兩支勁旅今季3度交鋒大家勝和負各一，可見實力真係不相伯仲。西悉尼流浪者賽前只係安排咗兩課輕鬆操練，目的係幫班球員減壓。講真吖，阿占覺得流浪者首次踢澳職就入決賽，真係有晒交代o架喇，相信班球員拎住個常規賽冠軍喺手，壓力真係唔多大嘅。係，荷蘭翼鋒靴斯今場停賽，不過另一件快翼馬克布歷治經過連日治療、又為足踝傷進行注射後，據聞好有機會復出喺決賽披甲，有佢同爆紅嘅小野伸二拍住上，使驚流浪者冇波入咩？
水手齊心捱過欠薪風波

對家中岸水手上月爆出財政危機，幾乎搞到罷踢，好在班手足家陣終於肯上下一心頂硬上，成功殺入決賽，勁有義氣兼團結！論實力，中岸水手絕對係澳職一哥，金靴前鋒麥比連喺常規賽射入17球、4強又一箭定江山，依家狀態同信心都鬼咁高漲，咪忘記中岸水手連續兩季季後賽都係輸12碼，今場自然唔想再歷史重演啦，肯定會喪攻同流浪者死過，呢個晏晝，球迷們等睇入波啦！

頂占筍盤：西悉尼流浪者（入球大）
澳季後賽制：

今場為總決賽，如法定時間內打和將加時30分鐘，未分勝負則互射12碼決勝。