3.3倍讓球勝 西布朗圍城

猪拉多纳

曼城衞冕聯賽冠軍希望幻滅後，下半季以足總盃冠軍為首要目標，今輪聯賽主場對西布朗只屬例行公事，教頭文仙尼識得分輕重，預期今戰會派出大批副選落場，務求以最佳人腳及狀態迎接足總盃決賽，戰意不足靠唔住，「讓球客勝」有3.3倍博得過！

（有線200及300台周三凌晨2時45分直播）

計晒聯賽及盃賽，曼城近十一次主場出擊贏咗十場，今場遇上季尾狀態麻麻嘅西布朗，被捧成一面倒熱門屬意料中事。不過，曼城依家有個更重要嘅任務在身，下場足總盃決賽對韋根先係球隊本季最重要一戰，文仙尼雖然唔係好叻，但都唔係傻嘅，今次點都會留吓力，預期大衞施華、耶耶托尼同阿古路等主將會休戰，查維加西亞、魯迪維爾及高路托尼等後備兵可望登場，鬥心有限。
曼城着眼足總盃

西布朗又點先？論近況佢哋並唔突出，上場主場兩度領先都反輸畀韋根，畢竟班波已經上岸，又冇得爭歐洲賽席位，踢得唔夠肉緊都可以理解。不過，呢班波中前場有個危險人物，「新魔獸」盧卡古今季長期保持穩定表現，最叻喺前線用速度及身位硬爆對手球員，今次作客環境啱晒佢發揮，即使另一箭頭麥克科東尼要坐波監，大軍仍有足夠火力爭取士哥。

曼城過去五次對西布朗錄得四勝一和，和波嗰場係作客，計績計級數一定贏晒，但依家主勝低至1.26倍，仲要明知佢哋矛頭係下一場足總盃決賽，呢隻熱門存在疑點，絕不值博！西布朗早前曾經作客搞掂實力分子利物浦，遇強亦有反抗能力，今戰若能做好防守，有力保持不敗，博「讓球客勝」。