見習生季尾有計

猪拉多纳

　　如果閣下鋤過大弟，或多或少體驗到咩叫「風水輪流轉」。除非有一家牌技特別差，好牌唔識出，衰牌又唔識出，先會一直黑到尾。若不是以上狀況，通常都係東家旺完西家旺。至於贏輸，就要看誰能善用運勢了。

　　馬場上，都是「風水輪流轉」，季初由某練馬師或騎師威，季中又有另一班人扶搖直上，到了季尾，就輪到第三梯隊進攻。數近期旺人，可說是呂卓賢了。連續兩期於騎師王彩池封王，前日更憑「金鹿」、「歡欣星」及「御鋒」中三元，不是說這位年輕人唔勁，但說到底，還是見習生的減磅優勢作怪。

　　季初及季中階段，由於大部分馬匹體力充沛，贏得冠軍，通常有非凡實力，故此，就算質素較次之馬配見習生少幾磅，亦好難偷雞。但是，去到季尾狀況就完全唔同，好馬一早就收爐等下季，留下來的，通常都是質庸之輩，邊個慳得多，可能就是冠軍了，見習生有幾磅減咁數，點會唔係成日贏？洋超