最緊要不拘冷熱

猪拉多纳

　　練馬師鬥志好，不拘冷熱，實是馬迷福氣。如果熱倒冷爆，買馬好似玩捉迷藏，又或者成日估佢唔到，買親都唔中，冇買就畀佢篤爆，冇癮又谷氣，仲要輸埋錢，真係貼錢買難受。

　　有啲馬房久唔久「爆軚」，爆出巨型冷W，三幾十倍，甚至99倍，馬主中唔中唔知，總算係有驚喜，如果係雞仔注馬迷，咁好彩買中咗，多謝都嚟唔切，點會介意呢類馬房啲馬「無啦啦」出冷。

　　個別馬房好似苗禮德、賀賢、徐雨石、姚本輝等，有時話爆就爆，呢啲馬房養馬唔少，偏偏又時常有冷門出籠，抵佢哋長搵長有。