華倫國米拍檔做「細」界

猪拉多纳

褪色勁旅做「細」界！國際冠軍盃今晚進行第5至8名嘅4強賽，兩支昔日勁旅華倫西亞同國際米蘭將會碰頭，可惜今時唔同往日，「蝙蝠軍團」主力射手蘇爾達杜走人後唔止令火力大跌，仲馬上狂踩窮鬼舊東家「冇前途」；至於國米亦都青黃不接，海軍鬥水兵唔慌多波入，當然推介2倍入球細啦！（now632及621台周一凌晨4:00直播）

仲記得華倫西亞早年曾豪花2,500萬歐元收購祖亞昆，及用2,000萬歐元買班尼加，財力絕對唔弱。但嚟到今日佢哋唔止要連續賣走韋拿、大衞施華同桑馬達等主力「填氹」，連續3季成為球隊神射手嘅蘇爾達杜亦都啱啱走埋，佢離隊後仲要狠插「蝙蝠軍團」會長係「大話精」，話唔覺得球會會有將來喎！

華倫4場入得2粒
睇「華倫」陣容同近績，小妹都覺得「蘇大盜」講得冇錯，佢走人後，呢隊波就只可以單靠柏利祖同表現唔穩定嘅莊拿斯干卡維斯數胡，難怪踢咗4場熱身賽都未贏過兼只係入過2粒，仲連曼海姆同卡爾斯魯厄呢啲較弱嘅球隊都鬥唔過，想射穿國米認真有難度。

至於國際米蘭亦都唔好得幾多，睇佢哋嘅孭飛球星仍然係養緊傷嘅老將辛尼迪同迪亞高米列圖，就知呢隊波認真「出事」！「藍黑兵團」上季排名只得第9，係自1999年以嚟首次冇歐洲賽踢，今夏亦都未有具分量嘅收購，加埋去季次席射手卡斯辛奴離隊，要繼續靠效率唔高嘅柏拉斯奧數胡，先賽和漢堡、再獲車路士「慨贈」兩蛋都好正常，今場睇怕好難開入球騷喇。