皇馬砌車大私片

猪拉多纳

名帥博弈 搏到甩翼
國際冠軍盃決賽會喺美國邁阿密永明體育場上演，由皇家馬德里決戰車路士。今場係重量級熱身賽，兩軍棋逢敵手，咁啱兩位主帥都係倒戈出戰，車路士教頭莫連奴同多個皇馬球星有牙齒印，今次仇家聚頭，可謂愛恨交纏；而皇馬新帥安察洛堤亦對當年畀車仔炒魷耿耿於懷，兩大名帥博弈，私底下都希望一挫舊東家，為自己爭番啖氣，大盤係今仗投X首選。

（now 632及621周四早上9時直播）

肥安寸王爭啖氣
莫連奴向來天不怕、地不怕，去到皇馬執教後周圍辣火頭，最大膽係棄用西班牙幫大佬卡斯拿斯，因而得罪晒隊內土砲，無法獲得更衣室支持。莫連奴本來仲有葡萄牙幫班同鄉撐住，不過佢教到走火入魔，連愛將C朗都頂佢唔順，結果佢哋反目成仇，莫帥黯然離開皇馬，非常冇癮，今次佢話咁快就倒戈出戰，咁要面嘅佢當然唔會放過呢次報仇良機啦！

莫連奴返到車路士地位完全唔同晒，球隊上下個個都當佢神咁拜，佢有「乖仔」艾辛長伴左右，又有泰利及林柏特等老臣子擁護，管治根基紮實好多。車仔新季增添雲堅基爾、舒賀爾尼等優質新將，又回收盧卡古及哥雲迪布尼，整體戰鬥力和板櫈深度提高不少，大軍於熱身賽表現勁對辦，至今保持長勝走勢，近期更接連殺敗米蘭雙雄，贏來清風送爽，今仗絕對唔怕同皇馬鬥攻。

C朗谷氣要攞彩
皇馬眾星唔妥莫連奴好耐，其中天之驕子C朗近期仲畀莫帥寸係「A貨朗拿度」，谷埋一肚氣，係時候喺場上盡情發洩。皇馬喺熱身賽繼續保持攻強守弱作風，得、失球數字高企，加埋主帥安察洛堤01年執教車路士時慘吃阿布無情雞，條氣當然唔順，今次佢同樣會掉轉槍頭鬥舊主，必定唔想衰畀阿布睇。

兩軍上下都鬥志鮮明，雖然只係無關痛癢嘅一項季前身賽錦標，但因上述因素令場波嘅競爭性同可觀情大增，呢種場合雙方各不相讓勝負雖然難料，但炮製大量入波卻可以預期，宜直取大盤。賽制方面，90分鐘打和不設加時，立即以互射12碼決勝。