PSG開鑼戰得利

猪拉多纳

白蘭斯搵卡雲尼激活伊巴
新一季法國甲組聯賽拉開戰幔，揭幕戰由擂台躉巴黎聖日耳門（PSG）作客對蒙彼利埃，上季聯賽盟主PSG上周喺法冠盃對波爾多完成大逆轉，主帥白蘭斯眼見王牌前鋒伊巴謙莫域出奇落力，預計會讓「標王」卡雲尼先坐冷板激勵伊巴，以PSG喺聯賽大超班嘅質素，要玩謝甩皮甩骨嘅蒙彼利埃冇難度，新季可望打響頭炮。

（周六凌晨2時30分開賽）

由於暴發戶摩納哥大事擴軍，誓要同聖日耳門喺聯賽爭一日長短，當然PSG亦不敢怠慢，重金從意甲簽入卡雲尼及馬昆奴斯哥利亞兩大猛將，其中「標王」卡雲尼轉會費高達6,450萬歐元，成為法甲史上冧巴溫，難怪首席前鋒伊巴謙莫域坐立不安，上仗法冠盃對住波爾多，伊巴趁住卡雲尼未有披甲表現搶韁，不但食咗鋪詐胡，還助攻畀安根達扳平，成為聖日耳門反勝2比1捧盃嘅大功臣。由於卡雲尼初嚟埗到，仍需要時間適應，主帥白蘭斯唔會急於讓呢位上季意甲金靴正選上陣，相信可激勵「戰神」伊巴繼續有貨交。

蒙彼利埃星散唔使預
儘管前季蒙彼利埃喺聯賽封王，但佢哋唔似得聖日耳門及摩納哥，背後有條大水喉射住，惟有不斷賣人維生，多名主力如貝漢達、伊斯查達、謝尼贊普已經蟬過別枝，實力大跌Watt，就算有主場之利都信唔過。PSG當然想延續聯賽霸業，適逢大敵摩納哥因上季喺乙組比賽發生騷亂，未開咧先被扣兩分，對首都球隊非常有利，必趁歐聯未開波喺聯賽狂搶分確立優勢，今仗作客蒙彼利埃唔會手軟，客勝有1.67倍非常值博。