費利拿失地利 捧辛尼特客W

猪拉多纳

今晚歐聯外圍賽附加賽首回合激戰連場，葡超費利拿惡戰俄超班霸辛尼特，由於前者主場太細，被迫要移師波圖嘅火龍球場舉行，實力唔夠揪之餘，仲冇埋地利認真濕滯，相反辛軍前鋒侯克今仗重返舊東家主場比賽，定必踢得起勁，客勝有1.75倍不容錯過。

（有線62及202台周三凌晨2時45分直播）

上季在葡超異軍突起嘅費利拿，今季流失包括中場發電機雷斯卡路士、迪奧高費古拉斯及安頓尼斯等主力，但又冇乜點增兵，想借曼聯水貨碧比又因莫財，傾到依家都仲未傾掂數，實力嚴重受削下，開鑼日輸畀布拉加一戰全無還手之力。最慘係費利拿個主場實在太細，只能容納約5,000人，唔符合歐洲足協嘅標準，搞到被迫要移師去波圖嘅主場火龍球場作賽，家陣連主場之利都冇埋，形勢又衰多二錢。
侯克要冧波圖粉絲

相反，俄超辛尼特唔甘心做山寨王，希望喺歐聯威威，況且佢哋大把錢，陣中有侯克同韋素等猛將，又有意大利名帥史巴列堤領軍，對闖入歐聯分組賽可謂志在必得。而侯克去年9月匆匆由波圖過檔辛尼特，嚟唔切同一眾波圖粉絲道別，今次借住重遊舊地嘅機會，踢番場好波向「中立球迷」致意，戰意唔使懷疑。

辛尼特各項條件都贏晒費利拿，首回合先拔頭籌冇難度，直取客勝。