里昂o靚仔剃蘇

猪拉多纳

新帥加迪栽培新人有料到

正所謂初生之犢不畏虎，里昂班o靚仔仲要打順條氣，唔赦皇家蘇斯達！歐聯附加賽首回合法甲里昂主場鬥西甲皇家蘇斯達，里昂年輕化收到成效，開季4連勝兼打起小將拿卡錫迪，客軍正印前鋒阿基列斯缺陣攻力削，里昂讓得起平半！

（有線64及203台周三凌晨2時45分直播）

歐洲新球季啱啱開始，細鬼又有機會同大家講波經。呢季我會主力分析周中歐聯賽事，為讀者推介好料！係人都知歐聯水準高又夠星味，豪門都吼實呢個大金礦，依家進行附加賽，邊隊贏咗就可殺入分組賽，各路雄師一定搏到盡。
蘇斯達缺箭頭難偷雞

里昂一向係歐聯常客，但近年畀巴黎聖日耳門、馬賽爬頭，今年風頭更不及摩納哥。呢班波為配合法國搞下屆歐洲國家盃要起新球場，所以要行「緊縮政策」，多名高人工主力如巴菲迪比高美斯已遭棄用，利辛度盧比斯、洛夫雲等亦被賣走。但有句說話叫「柳暗花明又一村」，新帥加迪之前由二隊升做主教練，非常熟悉隊內青訓體系，加上球員時代曾効力阿仙奴，深受恩師雲格影響，故對栽培年輕球員特別有心得，例如拿卡錫迪、加連尼亞、烏姆迪迪等B隊產品，新季都交到功課，尤其拿卡錫迪頭2場聯賽入3球，真係唔講得笑！年輕球員係打道氣，依家里昂氣勢正盛，想勒都勒唔住。

蘇斯達方面，今夏除伊拿拉文迪被賣到皇馬外，其餘主力均在陣，不過正選箭頭阿基列斯倦勤，今仗作客更缺乏爭勝本錢，呢場都係死守，到次回合先搏殺，受讓平半都咪掂。